Shri Govindaraja Suprabhatam

 श्रीगोविन्दराजसुप्रभातम् 
श्रीभूमिनायक दयापर दिव्यमूर्ते
      देवादिदेव जगदेकशरण्य विष्णो ।
गोपाङ्गनाकुचतटेषु निमग्नदृष्टे
      गोविन्दराज विजयिन् तव सुप्रभातम् ॥ १॥

देवादिदेव फणिराजविहङ्गराज-
      राजत्किरीटमणिराजविराजिताङ्घ्रे ।
राजाधिराज वसुदेवकुलाधिराज
      गोविन्दराज विजयिन् तव सुप्रभातम् ॥ २॥

कासारयोगिपरमाद्भुतभक्तिबद्ध-
      वाङ्मूलभूषितमहोत्पलरम्यपाद ।
गोपाधिनाथ वसुदेवकुमार कृष्ण
      गोविन्दराज विजयिन् तव सुप्रभातम् ॥ ३॥

श्रीभूतयोगिपरिकल्पितदिव्यमान-
      ज्ञानप्रदीपपरिदृश्यरतैकतान ।
गोगोपजालपरिरक्षणबद्धदीक्ष
      गोविन्दराज विजयिन् तव सुप्रभातम् ॥ ४॥

मान्यानुभावमहदाह्वययोगिदृष्टे
      श्रीशङ्खचक्रकमलासहितामलाङ्ग ।
गोपीजनप्रियचरित्र विचित्रवेष-
      गोविन्दराज विजयिन् तव सुप्रभातम् ॥ ५॥

श्रीमत्त्वदीयपदपङ्कजभक्तिनिष्ठ-
      श्रीभक्तिसारमुनिनिश्चितमुख्यतत्त्व ।
गोपीजनार्तिहर गोपजनान्तरङ्ग
      गोविन्दराज विजयिन् तव सुप्रभातम् ॥ ६॥

श्रीमत्पराकुशमुनीन्द्रसहस्रशाख-
      संस्तूयमानचरणाम्बुज सर्वशेषिन् ।
गोपालवंशतिलकाच्युतपादपद्म
      गोविन्दराज विजयिन् तव सुप्रभातम् ॥ ७॥

शेषाचले महति पादपपक्षिजन्म
      तद्भक्तितः स्पृहयता कुलशेखरेण ।
राज्ञा पुनःपुनरुपासितपादपद्म
      गोविन्दराज विजयिन् तव सुप्रभातम् ॥ ८॥

श्रीविष्णुचित्तकृतमङ्गलदिव्यसूक्ते
      तन्मानसाम्बुरुहकल्पितनित्यवास ।
गोपालबालयुवतीविटसार्वभौम
      गोविन्दराज विजयिन् तव सुप्रभातम् ॥ ९॥

श्रीविष्णुचित्तकुलनन्दनकल्पवल्ली
      गोदालकान्तविनिवेशितमाल्यलोल ।
गोपाङ्गनाकुचकुलाचलमध्यसुप्त
      गोविन्दराज विजयिन् तव सुप्रभातम् ॥ १०॥

भक्ताङ्घ्रिरेणुमुनिना परमत्वदीय-
      शेषत्वमाश्रितवता विमलेन नित्यम् ।
प्राबोधकीस्तुतिकृता ह्यवबोधितश्रीः
      गोविन्दराज विजयिन् तव सुप्रभातम् ॥ ११॥

श्रीपाणनामकमहामुनिदिव्यनाम-
      दिव्यानुभावदयमानदृगञ्चलाख्य ।
पूर्णानुकम्प पुरुषोत्तम पुष्कराक्ष
      गोविन्दराज विजयिन् तव सुप्रभातम् ॥ १२॥

भक्तोत्तमाय परकालमुनीन्द्रनाम्ने
      विश्राणितातुलमहातनुमूलमन्त्र ।
सर्वात्मरक्षणविचक्षण चक्रपाणे
      गोविन्दराज विजयिन् तव सुप्रभातम् ॥ १३॥

सत्त्वोत्तरैः सततसेव्यपदाम्बुजेन
      संसारतारकदयार्द्रदृगञ्चलेन ।
सौम्योपयन्तुमुनिमानसराजहंस
      गोविन्दराज विजयिन् तव सुप्रभातम् ॥ १४॥

भक्तप्रपन्नकुलनायकभाष्यकार-
      सङ्कल्पकल्पतरुदिव्यफलामलात्मन् ।
श्रीशेषशैलनिकटस्थितशेषशायिन्
      गोविन्दराज विजयिन् तव सुप्रभातम् ॥ १५॥

श्रीमच्छठारिकरुणाश्रितदेवगान-
      सारज्ञनाथनुनिसन्नुतपुण्यमूर्त ।
गोब्राह्मणप्रियगुरो श्रितपारिजात
      गोविन्दराज विजयिन् तव सुप्रभातम् ॥ १६॥

देव प्रसिद्ध करुणाकर भक्तवर्ग-
      सेनापतिप्रणयिताखिललोकभानो ।
श्रीवासदिव्यनगराधिप राजराज
      गोविन्दराज विजयिन् तव सुप्रभातम् ॥ १७॥

इति श्रीगोविन्दराजसुप्रभातं सम्पूर्णम् ।


Proofread by Saritha Sangameswaran