Indradyumnakritam 1 Vishnu Stotram

इन्द्रद्युम्नकृतं १ विष्णुस्तोत्रम्

राजा (इन्द्रद्युम्न)उवाच । श्रियः कान्त नमस्तेऽस्तु श्रीपते पीतवाससे । श्रीद श्रीश श्रीनिवास नमस्ते श्रीनिकेतन ॥ १०॥ आद्यं पुरुषमीशानं सर्वेशं सर्वतोमुखम् । निष्कलं परमं देवं प्रणतोऽस्मि सनातनम् ॥ ११॥ शब्दातीतं गुणातीतं भावाभावविवर्जितम् । निर्लेपं निर्गुणं सूक्ष्मं सर्वज्ञं सर्वभावनम् ॥ १२॥ प्रावृण्मेघप्रतीकाशं गोब्राह्मणहिते रतम् । सर्वेषामेव गोप्तारं व्यापिनं सर्वभाविनम् ॥ १३॥ शङ्खचक्रधरं देवं गदामुसलधारिणम् । नमस्येऽहं हृषीकेशं सर्वपापहरं हिरिम् ॥ १४॥ नागपर्यङ्कशयनं क्षीरोदार्णवशायिनम् । नमस्येऽहं हृषीकेशं सर्वपापहरं हरिम् ॥ १५॥ पुनस्त्वां देवदेवेशं नमस्ये वरदं विभुम् । सर्वलोकेश्वरं विष्णुं मोक्षकारणमव्ययम् ॥ १६॥ इति ब्रह्मपुराणे एकपञ्चाशत्तमाध्यायान्तर्गतं इन्द्रद्युम्नकृतं विष्णुस्तोत्र समाप्तम् । ब्रह्मपुराण । अध्याय ५१/१०-१६॥ brahmapurANa . adhyAya 51/10-16.. Proofread by PSA Easwaran