Indradyumnakritam 4 Vishnu Stotram

 इन्द्रद्युम्नकृतं ४ विष्णुस्तोत्रम् 

इन्द्रद्युम्न उवाच ।
नमस्ते जगदाधार जगदात्मन्नमोऽस्तु ते ।
कैवल्यत्रिगुणातीत गुणाञ्जन नमोऽस्तु ते ॥ ११९॥

सुशुद्धनिर्मलज्ञानस्वरूपाय नमोऽस्तु ते ।
शब्दब्रह्माभिधानाय जगद्रूपाय ते नमः ॥ २.१७.१२०॥

संसारपतितश्रान्तदुःखध्वंस नमोऽस्तु ते ।
दुर्भेद्यहृदयग्रन्थिभेदकाय नमोऽस्तु ते ॥ १२१॥

द्विसप्तभुवनागारमूलस्तम्भाय ते नमः ।
ब्रह्माण्डकोटिघटनाशिल्पिने चक्रिणे नमः ॥ १२२॥

करुणामृतपाथोधिसुधाधाम्ने नमो नमः ।
दीनोद्धारैकगुह्याय कृपापाथोधये नमः ॥ १२३॥

प्रकाशकानां सूर्यादिज्योतिषां ज्योतिषे नमः ।
प्रतिस्वस्वनदीप्ताय अन्तःपापाग्नये नमः ॥ १२४॥

पावकाय पवित्राय पवित्राणां नमो नमः ।
गरिष्ठाय वरिष्ठाय द्राघिष्ठाय नमो नमः ॥ १२५॥

नेदिष्ठाय दविष्ठाय क्षोदिष्ठाय नमो नमः ।
वरेण्याय सुपुण्याय नारायण नमोऽस्तु ते ॥ १२६॥

परित्राहि जगन्नाथ दीनबन्धो नमोऽस्तु ते ।
निस्तीर्णोऽहं भवाम्भोधिं प्राप्य त्वां तरणिं सुखाम् ॥ १२७॥

त्वयि दृष्टे रमानाथ क्लेशा व्यपगता मम ।
चिदानन्दस्वरूपं त्वां प्राप्तानां दुःखसङ्क्षयः ॥ १२८॥

ध्रुवं नाथ समुत्पन्नपरमानन्दहेतुकम् ।
त्राहि त्राहि भवाम्भोधिमग्नं मां दीनचेतसम् ॥ १२९॥

मध्याह्नार्कोदिते व्योम्नि कुतः सन्तमसोदयः ।
ध्यानस्थितः स्तुवन्नेवं प्रणम्य जगदीश्वरम् ॥ २.१७.१३०॥

ध्यानावसाने स पुनः स्वयं जाग्रदबुध्यत ॥

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्ये
      सप्तदशाध्यायान्तर्गतं इन्द्रद्युम्नकृतं विष्णुस्तोत्रं समाप्तम् ।

स्कन्दपुराण । वैष्णवखण्ड । पुरुषोत्तमखण्ड । अध्याय १७/११९-१३०॥


skandapurANa . vaiShNavakhaNDa . puruShottamakhaNDa . adhyAya 17/119-130..

Proofread by PSA Easwaran