जगन्नाथगीतामृतम्
गीतेन गायन् करुणाकरस्य
ब्रह्मस्वरूपं हृदयेन विष्णोः ।
सहानुप्रासैर्जयतात्कवीन्द्रः
प्रदीप्तनन्दो मुरलीविमुग्धः ॥
कलाकलेवरकृष्ण करुणाकर
सुभद्रासहितबलरामसुन्दर ॥ ध्रुवम्॥
सुललितहस्तिवेशसुमनोहरः
करपादहीनविभुपरमेश्वरः ।
स्नानमण्डपपण्डितरसनागर
कलाकलेवरकृष्ण करुणाकर ॥ १॥
विरहविधुरराधाकान्तसुन्दर
शीतलातरलनीरशीतलतर ।
ब्रह्मदारुजगन्नाथसुखनिकर
कलाकलेवरकृष्ण करुणाकर ॥ २॥
भट्टभक्तिधर विभो निर्जरवर
अक्षयकीर्तिगदित दयासागर ।
दर्शनविकलमनो नन्दकुमार
कलाकलेवरकृष्ण करुणाकर ॥ ३॥
गोपरमणीरमणगोपनचोर
वेणुनादसुरभितयमुनातीर ।
कुरु कुशलं विष्णो नन्दकिशोर
कलाकलेवरकृष्ण करुणाकर ॥ ४॥
अष्टोत्तरशतघटस्वर्णसुकर
शुभवासकूपजलस्नानविधुर ।
समन्त्रसवाद्यनादशोभनकर
कलाकलेवरकृष्ण करुणाकर ॥ ५॥
इति नन्दप्रदीप्तकुमारविरचितं जगन्नाथगीतामृतं सम्पूर्णम् ।
Composed, encoded, and proofread by
Dr. Pradipta Kumar Nanda, Kendrapara, Orisa pknanda65 at gmail.com