Jaiminiproktam Vishnu Stotram

 जैमिनिप्रोक्तं विष्णुस्तोत्रम् 

सर्वव्यापिञ्जगन्नाथ भूतभव्यभवत्प्रभो ।
त्राहि मां पुण्डरीकाक्ष विष्णो संसारसागरात् ॥ ९॥

एकार्णवजले रौद्रे निरालम्बे पुरा मधुम् ।
अवधीर्विश्वरक्षार्थं मधुसूदन रक्ष माम् ॥ २.२.४४.१०॥

त्रीन्विक्रमान्क्रमित्वा यो हत्वा दैत्यबलं महत् ।
त्रैलोक्यं पालयामास त्रिविक्रम नमोऽस्तु ते ॥ ११॥

कृत्वा वामनकं रूपमृग्यजुःसामगर्भकम् ।
मोहयित्वाद्भुतं रूपं तस्मै मायाविने नमः ॥ १२॥

यः श्रियं धारयेन्नित्यं हृदि भक्तेभ्य एव च ।
ददात्यपि श्रियं तस्मै श्रीधराय नमोऽस्तु ते ॥ १३॥

इन्द्रियाणामधिष्ठाता यः सर्वेषां सदा प्रभुः ।
सुखैकहेतुर्भक्तानां हृषीकेश नमोऽस्तु ते ॥ १४॥

यन्नाभिपद्मसम्भूतं जगदेतच्चराचरम् ।
विधातुरासनं नित्यं पद्मनाभ नमोऽस्तु ते ॥ १५॥

यस्यैतत्त्रिगुणैर्बद्धं जगदेतच्चराचरम् ।
दाम्ना बद्धः स गोप्या तु दामोदर नमोऽस्तु ते ॥ १६॥

त्रैलोक्यविप्लवकरं हतवान्केशिदानवम् ।
ईशिता सर्वसौख्यानां त्राहि केशव मां प्रभो ॥ १७॥

स्रष्टा ससर्ज भूतानि जगतामादिकारणम् ।
अचिन्त्यमहिमन्विष्णो नारायण नमोऽस्तु ते ॥ १८॥

मायया यस्य विश्वं वै मोहितं यदनाद्यया ।
सर्वधर्मस्वरूपाय माधवाय नमो नमः ॥ १९॥

ज्ञानिनां ज्ञानगम्यस्त्वमगतीनां गतिप्रदः ।
सम्पूर्णमस्तु गोविन्द त्वत्प्रसादाद्व्रतं मम ॥ २.४४.२०॥

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्ये
      चतुश्चत्वारिंशाध्यायान्तर्गतं जैमिनिप्रोक्तं विष्णुस्तोत्रं समाप्तम् ।

स्कन्दपुराण । वैष्णवखण्ड । पुरुषोत्तमखण्ड । अध्याय ४४/९-२०॥


skandapurANa . vaiShNavakhaNDa . puruShottamakhaNDa . adhyAya 44/9-20..

Proofread by PSA Easwaran