Kaliyakrita Bhaktivara Prarthana

कालियकृता भक्तिवरप्रार्थना

कालिय उवाच । वरेऽन्यस्मिन्मम विभो वाञ्छा नास्ति वरप्रद ॥ ७४॥ भक्तिं स्मृतिं त्वत्पदाब्जे देहि जन्मनि जन्मनि । जन्म ब्रह्मकुले वाऽपि तिर्यग्योनिषु वा समम् ॥ ७५॥ तद्भवेत्सफलं यत्र स्मृतिस्त्वच्चरणाम्बुजे । तन्निष्फलः स्वर्गवासो नास्ति चेत्त्वत्पदस्मृतिः ॥ ७६॥ त्वत्पादध्यानयुक्तस्य यत्तत्स्थानं च तत्परम् । क्षणं वा कोटिकल्पं वा पुरुषायुः क्षयोऽस्तु वा ॥ ७७॥ यदि त्वत्सेवया याति सफलो निष्कलोऽथवा । तेषां चायुर्व्ययो नास्ति ये त्वत्पादाब्जसेवकाः ॥ ७८॥ न सन्ति जन्ममरणरोगशोकार्तिभीतयः । इन्द्रत्वे वाऽमरत्वे वा ब्रह्मत्वे चातिदुर्लभे ॥ ७९॥ वाञ्छा नास्त्येव भक्तानां त्वत्पादसेवनं विना । इति श्रीब्रह्मवैवर्तपुराणे श्रीकृष्णजन्मखण्डे पूर्वे एकोनविंशाध्यायान्तर्गता कालियकृता भक्तिवरप्रार्थना समाप्ता । ब्रह्मवैवर्तपुराण । श्रीकृष्णजन्म, पूर्वभाग । अध्याय १९/७३-७७॥ brahmavaivartapurANa . shrIkRRiShNajanma, pUrvabhAga . adhyAya 19/73-77.. Proofread by PSA Easwaran