श्रीकृष्णस्तवात्मकदण्डकम्
वृन्दावने शिशिरमन्दानिलाचलित-
कुन्दादिसूनसुविकासे
वन्दिबहुमुनिपरिषदिन्द्रमुखविबुधवर-
वृन्दपशुपशुपमिळिताशे ।
मणिपल्लवस्तबकसुरशाखिमूलगत-
कनकारविन्दपुटदेशे
परिलसितमसितनवजलदकुलतुलितरुचि
मुरमथनवपुरिदमुपासे ॥ १॥
व्यालोलपिञ्छवलयालम्बिसंयमित-
लोलम्बनीलकचपाशं
बालशशिरुचिरतरफालतलधृततिलक-
मालसिततिलकुसुमनासम् ।
मृदुगण्डसञ्चलित मणिकुण्डलं चटुल-
करुणावलोकनविलासं
मधुरलसदधरपुटपरिनिहितकळमुरळि
दशनरुचिविशदमृदुहासम् ॥ २॥
ताराळिताररुचिहारावलीवलयि-
तोरोविलोलवनमालं
ताररवमणिवलयहारिपृथुभुजयुगळ-
दूरलसद मलनजखालम् ।
तरळाङ्गुलीगळितमुरळीनिनादरस-
शिशिरीकृताशमनुवेलं
तनुविलसदुदरतलमनुपमितजघनभर-
परिघटिततटिदुपमचेलम् ॥ ३॥
शिञ्ञानहेममणिकाञ्चीकलापगुण-
सञ्जातभङ्गि परिपिङ्गं
चारुपृथुमसृणलसदूरुयुगमुपलसित-
जानुयुगमतिसुभगजङ्घम् ।
मणिनूपुराकलितचरणाम्बुजोल्लसित-
नखपङ्क्तिकान्तिजितशङ्खं
व्यतिनिहितपदयुगळमरुणतरचरणतल-
मुरुमहिमनिलयमकळङ्कम् ॥ ४॥
इति श्रीकृष्णस्तवात्मकं दण्डकं सम्पूर्णम् ।
Proofread by Mohan Chettoor