Krishnanarayana Stotram

कृष्णनारायणस्तोत्रम्

(गोपैः गोपीभिश्च कृतं कृष्णनारायणस्तोत्रम्) श्रीकृष्णश्च तथा गोपा गोप्यश्चाप्यर्बुदाऽर्बुदाः । हरिं प्रसादयामासुस्तोषयामासुरच्युतम् ॥ ४३॥ श्रीकृष्णोऽपि तदा नैजं मूलं परमकारणम् । अस्तौच्छ्रीपरमात्मानमवताराऽवतारिणम् ॥ ४४॥ ``यतो वयं चावतारास्तव मूर्तेः पृथक्स्थिताः । स्मोऽत्र धामाधिपतयस्तस्मै पित्रे नमः सदा'' ॥ ४५॥ यतो राधादयश्चापि भवन्मूर्तेः प्रशक्तयः । अस्मदर्धाङ्गतां प्राप्तास्तस्मै पित्रे नमो नमः ॥ ४६॥ यतश्चाऽन्येऽसङ्ख्यरूपा अवतारा भवन्त्यपि । तस्मै मूलपरब्रह्मपित्रे नमोऽवतारिणे ॥ ४७॥ प्रसन्नो भव कृष्णेश निजरूपेषु सर्वथा । यदाज्ञां प्रवहामोऽत्र तस्मै पित्रे मुहुर्नमः ॥ ४८॥ सदा त्वत्पूजनं चात्र करोमि सर्वथा पितः । अनुग्रहं सदेच्छामि पावितोऽहं ससार्थकः ॥ ४९॥ एवं स्तुत्वा हरिं नत्वा लब्ध्वा प्रसादमुत्तमम् । विदायं प्रददौ कृष्णः कृष्णनारायणाय वै ॥ ५०॥ इति श्रीलक्ष्मीनारायणीयसंहितायाः तिष्यसन्तानात्मकस्य श्रीकृष्णेन तथा गोपैः गोपीभिश्च कृतं कृष्णनारायणस्तोत्रं सम्पूर्णम् । लक्ष्मीनारायणीयसंहिता । खण्ड ४। अध्याय ९९/४३-५०॥ lakShmInArAyaNIyasaMhitA . khaNDa 4. adhyAya 99/43-50.. Proofread by PSA Easwaran