सरस्वतीप्रोक्तं कृष्णस्तोत्रम्
बलराम उवाच -
ततः किमकरोद्देवी किं वा त्वमकरोः प्रभो ।
तन्ममाचक्ष्व भगवन् श्रोतुं कौतूहलं परम् ॥ १५३॥
श्रीकृष्ण उवाच -
बलराम महाभाग भूयो देवी सरस्वती ।
मामेव परितुष्टाव वाग्भिरिष्टाभिरञ्जसा ॥ १५४॥ (रञ्जना)
प्रणयाविष्टहृदया हृदयानन्दकारिणो । (प्रलया)
अजस्रस्रवदस्राक्षी स्वेदवारिप्रपूरिता ॥ १५५॥
सरस्वती उवाच -
जय जय कारण कारणविष्णो जय जयिनां जयि निरयवि जिष्णो ।
जय धरणीधर धरणिपते जय सुजनब्रजवृजिनहते जय ॥ १५६॥
जय गणनायक नाथ हरे जय भवसागर तरणतरे जय ।
जय वृन्दावनविपिनविहारी जयदानवगणमुण्डनकारी ॥ १५७॥ (वृन्दा-विपिनविरजितविहरी, छेत्तत्करी)
जय देवाधिपमौलिविलासी जय चेतो हररूपविकासी ।
जय रससागर करुणासिन्धो जय नवनागर निरुपधिबन्धो ॥ १५८॥
जय जगदुद्भवयोनिरनादे जय वेदात्मक वेदविदादे । (जगदद्भुतयोनि)
जय विषमाशुग समसुषमान्त जय शामितशमनभयसुशान्त ॥ १५९॥
जय कल्पान्तसुकल्पित तल्प जय नतकल्पमहीरुगनल्प ।
जय कमलोदरसोदर दृष्टे जय परिपालितबहुतरसृष्टे ॥ १६०॥ (तुष्टो, परिपाति तवाद्भुतसृष्टे)
जय यमिनां हृदयाम्बुजगामी जय वामाकुलकेलिसुकामी ।
जय पीतांशुकवेष्टितमूर्ते जय मुनिमोहमनोरथपूर्ते ॥ १६१॥
जय रिपुवारिधिशोषाऽगस्ते जय भुवने परिगीतसमस्ते ।
जय युवजनगणमानसचोर जय लीलामयनित्यकिशोर ॥ १६२॥ (युवतिगण)
जय कनकाङ्गदसङ्गतबाहो जय कमलास्य कलानिधिबाहो । (कमलानिधि)
जय जगतीतलवलयनिदान जय नानासुखकलितनिधान ॥ १६३॥
जय कलिकल्मषराशिविमोक्ष जय वरपापिगणार्पितमोक्ष ।
जय नरकिन्नरदनुजनिवन्द्य जय सुरनागगणैरभि नन्द्य ॥ १६४॥ (सुरराग, वन्द्य)
जय सेवितपदविपदपनोद जय नित्यं रसकेलिसमोद ।
जय जय हरिहर परिहररोष जय करुणाङ्कुरु मे जहि दोषम् ॥ १६५॥ (हरिरवि परि, करुणाङ्कुर)
नमस्ते समस्तेश्वरस्येश्वराय
नमस्ते नमस्ते महिम्नां वराय ।
प्रसीदावसीदामि गाढं चिराय (प्रसीदावसादाभिगाढं)
प्रभो नीलजीभूतयूथाभकाय ॥ १६६॥
प्रभो त्वत्प्रसादान्न किञ्चापलभ्यं (त्वत्प्रसादात् किञ्चा)
य एवाश्रयन्ते पदं तेऽविलभ्यम् ।
नमस्ते कदम्बस्रजा शोभिताय
नमस्ते सुवर्णांशुकेनावृताय ॥ १६७॥
नमस्ते किरीटे मयूरछदाय
नमस्ते कपोले सपुष्पछदाय ।
नमस्तेस्तु कर्णे मणिकुण्डलाय
नमस्तेमुखाम्भोजनुर्मण्डलाय ॥ १६८॥
नमस्ते कपोलोल्लसच्चन्द्रकाय
नमस्तेऽरुणाम्भोजपत्रेक्षणाय ।
नमस्तेऽरुणौष्ठाय बिम्बाधराय
नमस्ते लसत्स्मेरदिव्यस्मराय ॥ १६९॥ (दीव्यत्स्मराय)
नमस्ते त्रिरेखाढ्यकण्ठोच्छ्रिताय
नमस्ते शिलापीठवक्षस्थलाय
नमस्तेस्तु मुक्ताफलालङ्कृताय
नमस्ते भ्रमत्षटपदैर्झङ्कृताय ॥ १७०॥
नमस्ते भुजादण्डसमण्डिताय
नमस्तेंऽसचञ्चद्वतंसाश्रिताय ।
नमस्तेऽरुणद्योतपाणिद्वयाय
नमस्तेस्तु नाभीगभीरह्रदाय ॥ १७१॥
नमस्तेऽरुणावासपादाम्बुजाय
नमस्ते नखेन्दुद्युतिद्योतिताय ।
नमस्ते मनोभूशतैर्वाञ्छिताय
नमस्ते जगन्मोहसम्मोहनाय ।
नमस्ते नमस्ते नमस्ते प्रियाय (प्रियाय प्रसीद)
प्रसीद प्रभो मे प्रसीद प्रसीद ॥ १७२॥ (प्रभो मे प्रसीद)
अहं (श्रीकृष्ण ) उवाच -
इतः परं स्थिरा कान्ते भव त्वं स्थिरमानसे ।
तवैव वदनाम्भोजच्यवद्वागमृतार्णवे ॥ १७३॥
स्नानात् पानात् सुतृप्तोऽस्मि न त्वां त्यक्ष्यामि मा रुद । (पानात नास्ति)
अद्यानवद्यचरिते करिष्यामि तवेप्सितम् ॥ १७४॥ (आढ्यानवद्य)
इदं स्तोत्रं पठिष्यन्ति ये नरा रचितं त्वया ।
तेषामेवास्मि नियतं प्रेमभक्तिप्रदायकः ॥ १७५॥
बलरामेत्त्युक्तवीत मयि सा न च किञ्चन ।
प्रोवाच लज्जा पाथोधिनिमग्ना कलितांशुका ॥ १७६॥
इति श्रीसरस्वतीप्रोक्तं श्रीकृष्णस्तोत्रं सम्पूर्णम् ।
Proofread by Tanvir Chowdhury