Lomashamuniproktam Balakrishna Kavacham

 लोमशमुनिप्रोक्तं बालकृष्णकवचम् 

तमेनं कथयाम्यद्य स्तवं कृष्णपरायणम् ।
``बालकृष्णोऽस्तु मे प्राच्यां चक्रहेतिः परेश्वरः ॥ ३६॥

गदाधरो बालकृष्णो दक्षिणे मेऽस्तु सर्वदा ।
पश्चिमे शार्ङ्गधृक कृष्णनारायणोऽस्तु मे सदा ॥ ३७॥

उत्तरे खड्गधृक् कृष्णनारायणोऽस्तु मे सदा ।
कोणेष्वस्तु हृषीकेशो मध्ये मध्ये जनार्दनः ॥ ३८॥

पृथ्व्यां वराहरूपोऽस्तु व्योम्नि नरहरिः प्रभुः ।
क्षुरधाराऽतितीक्ष्णं च सुदर्शनं समन्ततः ॥ ३९॥

प्रेतभूतान् प्रहन्त्वेव राक्षसाँश्च निशाचरान् ।
गदा सहस्रधारोर्ध्वं हन्तु वृकान् पिशाचकान् ॥ ४०॥

शार्ङ्गं धनुर्हरेस्तिर्यक्कुष्माण्डादीन् प्रहन्तु च ।
यक्षान् दैत्यान् जृम्भकाँश्च खगान् क्रूरान् विनायकान् ॥ ४१॥

शङ्खो विष्णोर्निनादेन हन्तु दुष्टाँश्च पन्नगान् ।
सिंहान् व्याघ्रान् शरभाँश्च दन्दशूकान् पशूँस्तथा ॥ ४२॥

विष्णोः पद्मं मम शत्रून् सौम्यान् दधातु गन्धतः ।
चित्तवृत्तिहरान् स्मृत्याहरान् बलौजसां हरान् ॥ ४३॥

सम्पद्भोगहराँश्चापि शुभलक्षणहारकान् ।
स्त्रीपुत्रधनसदनहरान् प्रशामयत्वपि ॥ ४४॥

हरेः सङ्कीर्तनाच्चाऽस्तु स्वास्थ्यमैन्द्रियकं मम ।
बुद्धिस्वास्थ्यं मनःस्वास्थ्यं देहस्वास्थ्यं सुखावहम् ॥ ४५॥

पृष्ठे चाग्रे पार्श्वयोश्च कोणेष्वस्तु हरिर्मम ।
शिखायां मे नखेष्वेषः चर्मस्वस्तु हरिर्मम'' ॥ ४६॥

``ॐ नमः श्रीकृष्णनारायणाय स्वामिने स्वाहा'' ।
इत्येवं राधिके! रक्षास्तोत्रं श्रीलोमशो मुनिः ॥ ४७॥

ददौ सर्वेभ्य एवादौ ततः प्राह निदर्शनम् ।

इति श्रीलक्ष्मीनारायणीयसंहिता । खण्ड २। अध्याय ६१-अध्यायान्तर्गतं
लोमशमुनिप्रोक्तं बालकृष्णकवचम् ।

लक्ष्मीनारायणीयसंहिता । खण्ड २। अध्याय ६१/३६-४७॥


lakShmInArAyaNIyasaMhitA . khaNDa 2. adhyAya 61/36-47..

Proofread by PSA Easwaran