Mahadevakritam Shri Krishna Stotram

महादेवकृतं श्रीकृष्णस्तोत्रम्

महादेव उवाच । ब्रह्मणा प्रार्थितस्त्वं च समागत्य वसुन्धराम् । भूभारहरणं कृत्वा प्रयासि स्वपदं विभो ॥ १९॥ त्रैलोक्ये पृथिवी धन्या सद्यः पूता पदाङ्किता । वयं च मुनयो धन्याः साक्षाद्दृष्ट्वा पदाम्बुजम् ॥ २०॥ ध्यानासाध्यो दुराराध्यो मुनीनामूर्ध्वरेतसाम् । अस्माकमपि यश्चेशः सोऽधुना चाक्षुषो भुवि ॥ २१॥ वासुः सर्वनिवासश्च विश्वानि यस्य लोमसु । देवस्तस्य महाविष्णुर्वासुदेवो महीतले ॥ २२॥ सुचिरं तपसा लब्धं सिद्धेन्द्राणां सुदुर्लभम् । यत्पादपद्ममतुलं चाक्षुषं सर्वजीविनाम् ॥ २३॥ इति ब्रह्मवैवर्तपुराणे श्रीकृष्णजन्मखण्डे पूर्वभागे एकोनत्रिंशाधिकशततमाध्यायान्तर्गतं महादेवकृतं श्रीकृष्णस्तोत्रं समाप्तम् । ब्रह्मवैवर्तपुराण । श्रीकृष्णजन्म, उत्तरभाग । अध्याय १२९/१९-२३॥ brahmavaivartapurANa . shrIkRRiShNajanma, uttarabhAga . adhyAya 129/19-23.. Proofread by PSA Easwaran