Maharshibhishcha Kritam Vishnu Stotram

महर्षिभिश्च कृतं विष्णुस्तोत्रम्

ब्रह्मादय ऊचुः । तं जातमात्रं भगवन्तमीशं नारायणं लोकपतिं पुराणम् । ब्रह्मा समभ्येत्य समं महर्षिभिः स्तोत्रं जगादाथ विभोर्महर्षे ॥ ३५॥ नमोऽस्तु ते माधव सत्त्वमूर्त्ते नमोऽस्तु ते शाश्वत विश्वरूप । नमोऽस्तु ते शत्रुवनेन्धनाग्ने नमोऽस्तु वै पापमहादवाग्ने ॥ ३६॥ नमस्ते पुण्डरीकाक्ष नमस्ते विश्वभावन । नमस्ते जगदाधार नमस्ते पुरुषोत्तम ॥ ३७॥ नारायण जगन्मूर्ते जगन्नाथ गदाधर । पीतवासः श्रियः कान्त जनार्दन नमोऽस्तु ते ॥ ३८॥ भवांस्त्राता च गोप्ता च विश्वात्मा सर्वगो । अव्ययः । सर्वधारी धराधारी रूपधारी नमोऽस्तु ते ॥ ३९॥ वर्धस्व वर्धिताशेषत्रैलोक्य सुरपूजित । कुरुष्व दैवतपते मघोनोऽश्रुप्रमार्जनम् ॥ ४०॥ त्वं धाता च विधाता च संहर्ता त्वं महेश्वरः । महालय महायोगिन् योगशायिन् नमोऽस्तु ते ॥ ४१॥ इत्थं स्तुतो जगन्नाथं सर्वात्मा सर्वगो हरिः । प्रोवाच भगवान् मह्यं कुरूपनयनं विभो ॥ ४२॥ इति वामनपुराणे एकोननवतितमाध्यायान्तर्गतं वामनप्रादुर्भावे ब्रह्मणा महर्षिभिश्च कृतं विष्णुस्तोत्रं समाप्तम् । वामनपुराण । अध्याय ८९/३६-४१॥ vAmanapurANa . adhyAya 89/36-41.. Proofread by PSA Easwaran