Mayaramabhattakrita Shri Hari Stuti

 मयारामभट्टकृता श्रीहरिस्तुतिः 

(वसन्ततिलकम्)
तेजोमये परमधामनि राजमानः
कन्दर्पको टिकमनीयसुभद्ररूपः ।
यो नैजमुक्तगणसेवितपादपद्मस्त्वां
धर्मनन्दनमहं प्रणमामि नित्यम् ॥ १॥

जेगीयमानचरितं श्रुतिशास्त्रवारैः
सर्वेश्वरं च परिपूर्णविबोधमाद्यम् ।
ब्रह्माण्डकोटिमनिशं परिपालयन्तं
त्वां धर्मनन्दनमहं प्रणमामि नित्यम् ॥ २॥

नैकात्ममुक्तिमनुचिन्तयमानमीशं
नैजेच्छया क्षितितले धृतमर्त्यनाट्यम् ।
भक्त्यात्मजं परमवल्लभवर्णिवेषं
त्वां धर्मनन्दनमहं प्रणमामि नित्यम् ॥ ३॥

मुक्तिप्रदं सकलमङ्गलमङ्गलञ्च
योगीन्द्रचित्तविनिवासपदं परेशम् ।
संसारघोरदुरितार्तिहरं महेशं
त्वां धर्मनन्दनमहं प्रणमामि नित्यम् ॥ ४॥

ध्यानं यदीयममलं तनुते प्रकाशं
यद्दर्शनं जनयते परमं प्रभावम् ।
यत्कीर्तनं कलयते चरमाम्प्रशान्तिं
त्वां धर्मनन्दनमहं प्रणमामि नित्यम् ॥ ५॥

भूतं ददाति सततं वचनामृतैर्यः
शिक्षां प्रदाय नियमैर्वितनोति धर्मम् ।
लोकोत्तरस्वचरितैः शमयत्यभद्रं
त्वां धर्मनन्दनमहं प्रणमामि नित्यम् ॥ ६॥

तोष्यमानगुणराशिममर्त्यवृन्दैः
सर्वात्मकं निखिलकारणकारणञ्च ।
श्रीधीधृतिप्रगतिनीतिचितिप्रकाशं
त्वां धर्मनन्दनमहं प्रणमामि नित्यम् ॥ ७॥

यन्नाम वर्तत इदा कलिकल्मषघ्नं
नैराश्यकर्दमनिमग्नप्रतारकञ्च ।
कल्पद्रुमोपममघौघहरप्रभावं
त्वां धर्मनन्दनमहं प्रणमामि नित्यम् ॥ ८॥

इति श्रीस्वामिनारायणबापाचरित्रामृतसागरे तृतीयप्रवाहे
द्विचत्वारिंशत्तमे तरङ्गे मयारामभट्टकृता श्रीहरिस्तुतिः सम्पूर्णा ।