Mohinyai Vasuproktam Purushottama Stotram

मोहिन्यै वसुप्रोक्तं पुरुषोत्तमस्तोत्रम् ३

वसुरुवाच । एवमभ्यर्च्य हलिनं ततः कृष्णं विचक्षणः । द्वादशाक्षरमन्त्रेण पूजयेत्सुसमाहितः ॥ ४०॥ द्विषड्वर्णकमन्त्रेण भक्त्या ये पुरुषोत्तमम् । पूजयन्ति सदा धीरास्ते मोक्षं प्राप्नुवन्ति वै ॥ ४१॥ न तां गतिं सुरा यान्ति योगिनो नैव सोमपाः । यां गतिं यान्ति विधिजे द्वादशाक्षरतत्पराः ॥ ४२॥ तस्मात्तेनैव मन्त्रेण भक्त्या कृष्णं जगद्गुरुम् । सम्पूज्य गन्धपुष्पाद्यैः प्रणिपत्य प्रसादयेत् ॥ ४३॥ जय कृष्ण जगन्नाथ जय सर्वाघनाशन । जय चाणूरकेशिघ्न जय कंसनिषूदन ॥ ४४॥ जय पद्मपलाशाक्ष जय चक्रगदाधर । जय नीलाम्बुदश्याम जय सर्वसुखप्रद ॥ ४५॥ जय देव जगत्पूज्य जय संसारनाशन । जय लोकपते नाथ जय वाञ्छाफलप्रद ॥ ४६॥ संसारसागरे घोरे निःसारे दुःखफेनिले । क्रोधग्राहाकुले रौद्रे विषयोदकसम्प्लवे ॥ ४७॥ नानारोगोर्मिकलिले मोहावर्तसुदुस्तरे । निमग्नोऽहं सुरश्रेष्ठ त्राहि मां पुरुषोत्तम ॥ ४८॥ इति नारदपुराणे उत्तरभागे पञ्चपञ्चाशत्तमाध्यायान्तर्गतं वसुप्रोक्तं पुरुषोत्तमस्तोत्रं समाप्तम् । बृहन्नारदीयपुराण । उत्तरभाग । अध्याय ५५/४४-४८॥ bRRihannAradIyapurANa . uttarabhAga . adhyAya 55/44-48.. Proofread by PSA Easwaran