Munibhih Kritam Vishnu Stotram

मुनिभिः कृतं विष्णुस्तोत्रम्

मुनय ऊचुः । जयस्व गोविन्द जगन्निवास जयोऽस्तु नः केशव ते प्रसादात् । जनार्दनास्मान्सलिलान्तरस्थानुद्धर्तुमर्हस्यनघप्रताप ॥ ३१॥ निशाचरैर्दारुणादर्शनैः प्रभो वरेण्य वैकुण्ठ वराह विष्णो । नारायणाशेषमहेश्वरेश प्रयाहि भीताञ्जय पद्मनाभ ॥ ३२॥ उपेन्द्र योगिन्मधुकैटाभघ्न विष्णो अनन्ताच्युत वासुदेव । श्रीशार्ङ्गचक्राम्बुजशङ्खपाणे रक्षस्व देवेश्वर राक्षसेभ्यः ॥ ३३॥ त्वं पिता जगतः शम्भो नान्यः शक्तः प्रबाधितुम् । निशाचरगणं भीममतस्त्वां शरणं गताः ॥ ३४॥ त्वन्नामसङ्कीर्तनतो निशाचरा द्रवन्ति भूतान्यपयान्ति चारयः । नाशं तथा सम्प्रति यान्ति विष्णो धर्मादि सत्यं भवतीह मुख्यम् ॥ ३५॥ इति ब्रह्मपुराणे एकोनविंशाधिकद्विशततमाध्यायान्तर्गतं मुनिभिः कृतं विष्णुस्तोत्रं समाप्तम् । ब्रह्मपुराण । अध्याय २१९/३१-३५॥ brahmapurANa . adhyAya 219/31-35.. Proofread by PSA Easwaran