पञ्चपञ्चाशन्नामस्थलस्तोत्रम्
भगवानुवाच -
सर्वगः सर्वभूतोऽहं न हि किञ्चिन्मया विना ।
चराचरे जगत्यस्मिन्विद्यते कुरुसत्तम ॥ ९॥
तथापि येषु स्थानेषु चिन्तनीयोऽहमर्जुन ।
स्तोतव्यो नामभिर्यैस्तु श्रूयतां तद्वदामि ते ॥ १०॥
पुष्करे पुण्डरीकाक्षं गयायां च गदाधरम् ।
लोहदण्डे तथा विष्णुं स्तुवंस्तरति दुष्कृतम् ॥ ११॥
कामाख्ये कुमारं नेपाले लोकभावनं
राघवं चित्रकूटे तु प्रभासे दैत्यसूदनम् ।
वृन्दावने च गोविन्दं मा स्तुवन्पुण्यभाग्भवेत् ॥ १२॥
मन्दोदपाने वैकुण्ठं माहन्त्रे चाच्युतं विभुं
जयं जयन्त्यां तद्वच्च जयन्तं हस्तिनापुरे ।
वाराहं कर्दमाले तु काश्मीरे चक्रपाणिनम् ॥ १३॥
जनार्दनं च कुब्जाम्रे मथुरायां च केशवम् ।
कुब्जके श्रीधरं तद्वद्गङ्गाद्वारे सुरोत्तमम् ॥ १४॥
शालग्रामे महायोगिं हरिं गोवर्धनाचले ।
पिण्डारके चतुर्बाहुं शङ्खोद्धारे च शङ्खिनम् ॥ १५॥
वामनं च कुरुक्षेत्रे यमुनायां त्रिविक्रमं
वनमालं च किष्किन्धायां देवं रैवतके द्विज
काशीजले महायोगं देवं चामिततेजसं
वैशाखयूपे अजितं विरजायां विप्रप्रियम् ।
विश्वेश्वरं तथा शोणे कपिलं पूर्वसागरे ॥ १६॥
श्वेतद्वीपपतिं चापि गङ्गासागरसङ्गमे ।
भूधरं देविकानद्यां प्रयागे चैव माधवम् ॥ १७॥
नरनारायणाख्यं च तथा बदरिकाश्रमे ।
समुद्रे दक्षिणे स्तव्यं पद्मनाभेति फाल्गुन ॥ १८॥
द्वारकायां तथा कृष्णं स्तुवंस्तरति दुर्गतिम् ।
रामं नाम महेन्द्राद्रौ हृषीकेशं तथार्बुदे ॥ १९॥
अश्वतीर्थे हयग्रीवं विश्वरूपं हिमाचले ।
नृसिंहं कृतशौचे च विपाशायां द्विजप्रियम् ॥ २०॥
नैमिषे यज्ञपुरुषं जम्बूमार्गे तथाच्युतम् ।
अनन्तं सैन्धवारण्ये दण्डके शार्ङ्गधारिणम् ॥ २१॥
उत्पलावर्तके शौरिं नर्मदायां श्रियःपतिम् ।
दामोदरं रैवतके नन्दायां जलशायिनम् ॥ २२॥
सर्वयोगेश्वरं चैव सिन्धुसागरसङ्गमे ।
सह्याद्रौ देवदेवेशं वैकुण्ठं मागधे वने ॥ २३॥
सर्वपापहरं विन्ध्ये उड्रेषु पुरुषोत्तमम् ।
हृदये चापि कौन्तेय परमात्मानमात्मनः ॥ २४॥
वटे वटे वैश्रवणं चत्वरे चत्वरे शिवम् ।
पर्वते पर्वते रामं सर्वत्र मधुसूदनम् ॥ २५॥
नरं भूमौ तथा व्योम्नि कौन्तेय गरुडध्वजम् ।
वासुदेवं च सर्वत्र संस्मरञ्ज्योतिषां पतिम् ॥ २६॥
अर्चयन्प्रणमंस्तु त्वं संस्मरंश्च धनञ्जय ।
एतेष्वेतानि नामानि नरः पापैः प्रमुच्यते ॥ २७॥
स्थानेष्वेतेषु मन्नाम्नामेतेषां प्रीणनं नरः ।
द्विजानां प्रीणनं कृत्वा स्वर्गलोकेऽभिजायते ॥ २८॥
इति विष्णुधर्मेषु षट्त्रिंशोऽध्यायान्तर्गतं श्रीकृष्णप्रोक्तं
पञ्चपञ्चाशन्नामस्थलस्तोत्रं सम्पूर्णम् ।
Proofread by PSA Easwaran