Parameshvara Stotram

परमेश्वरस्तोत्रम् ४

श्रीश्वेतायनव्यास उवाच । ॐ नमो युगरूपाय नमस्तिष्यादिमोक्षिणे । बालयोगिनीनाथाय नमस्ते बालयोगिने ॥ १॥ नमोऽसङ्ख्यचरित्राय नमश्चानन्दवार्धये । नमस्ते बालकृष्णाय बालान्तरात्मने नमः ॥ २॥ चिदचिद्वपुषेऽनादिश्रीकृष्णाय नमो नमः । बद्रिकापतये नरनारायणात्मने नमः ॥ ३॥ सर्वसौख्यविधात्रे ते सर्वधर्माधिकारिणे । यावल्लीलादिवास्याय नमस्ते साधुरूपिणे ॥ ४॥ साध्वीशक्तिसुमिश्राय स्वर्णरेखाजटाधृगे । एकरसस्वरूपाय सरोजनीजुषे नमः ॥ ५॥ एकधा दशधा सहस्रधा कोट्यर्बुदाब्जधा । कान्ताकान्तोऽन्वितश्चास्ते पृथक् चापि च ते नमः ॥ ६॥ यो दधार तु राधायाः कृते कृष्णं निजं वपुः । यश्च श्रियः कृते नारायणो नारायणेश्वरः ॥ ७॥ यश्च रम्यं वासुदेवं व्यूहं दधार सृष्टये । यश्च हिरण्मयं रूपं विष्णुरूपं दधार च ॥ ८॥ तथा तिष्याऽर्दितानां तूद्धाराय तापसां वपुः । धर्माद्दधार भगवान् नरनारायणात्मकम् ॥ ९॥ सर्वथा करुणापूर्णं साधुशीलसमन्वितम् । मुक्तर्षिसेवितं शान्तं तं नमामि परेश्वरम् ॥ १.१०॥ इति श्रीलक्ष्मीनारायणीयसंहितायाः तिष्यसन्तानात्मकस्य चतुर्थखण्डे प्रथमाध्यायन्तर्गतं परमेश्वरस्तोत्रं सम्पूर्णम् । लक्ष्मीनारायणीयसंहिता । खण्ड ४। अध्याय १/१-१०॥ lakShmInArAyaNIyasaMhitA . khaNDa 4. adhyAya 1/1-10.. Proofread by PSA Easwaran