पिशाचमोचनस्तोत्रम्
श्रीगणेशाय नमः । श्रीलक्ष्मीनृसिंहाय नमः ।
विशुद्धमजमानन्दमेकमात्रमखण्डितम् ।
सच्चिन्मात्रं परं शान्तं तद्धि ब्रह्म नमाम्यहम् ॥ १॥
यद्धासा निखिलं भाति यस्य नान्यत्प्रकाशकम् ।
पुराणमव्ययं ज्योतिं तद्धि ब्रह्म नमाम्यहम् ॥ २॥
यदेकं सर्वभूतेषु प्रतिरूपतया स्थितम् ।
ज्योतिर्यथोदपात्रेषु तद्धि ब्रह्म नमाम्यहम् ॥ ३॥
यदन्तः सर्वभूतानां यद्रूपमबाधितम् ।
मेवाभरणादीनां तद्धि ब्रह्म नमाम्यहम् ॥ ४॥
यदेकं सर्वभावानां निरन्तरमदूषितम् ।
चिन्मात्रं निष्कलं पूर्णं तद्धि ब्रह्म नमाम्यहम् ॥ ५॥
ये नार्थान्भजते जन्तुः इन्द्रियेषु मनस्यपि ।
निरहङ्कारमानन्दं तद्धि ब्रह्म नमाम्यहम् ॥ ६॥
यन्मनो मनसां प्राणः प्राणानामिन्द्रियं वरम् ।
सर्वात्मकमखण्डं सत्तद्धि ब्रह्म नमाम्यहम् ॥ ७॥
यन्नामगुणरूपाद्यैः विचित्रमणिसर्वगम् ।
नीयते पशुबुद्धीनां तद्धि ब्रह्म नमाम्यहम् ॥ ८॥
यस्मादुदेति सद्विश्वं येन जीवति वर्धते ।
यस्मिन् प्रलीयते सर्वं तद्धि ब्रह्म नमाम्यहम् ॥ ९॥
यतो वागादया भावाः उत्थिताः स्वस्वकर्मसु ।
प्रवर्तन्ते साक्षिरूपात् तद्धि ब्रह्म नमाम्यहम् ॥ १०॥
यद् ग्रासकं ग्रासकाणां वीराणां च विवर्धनम् ।
व्यापकं व्यापकानां च तद्धि ब्रह्म नमाम्यहम् ॥ ११॥
सकलं निष्कलं व्योम मायातीतं निरञ्जनम् ।
अस्तिनास्तिद्वयातीतं तद्धि ब्रह्म नमाम्यहम् ॥ १२॥
यज्ज्वालयति कालाद्यास्तमो येन प्रकाशते ।
महाज्वालातमोरूपं तद्धि ब्रह्म नमाम्यहम् ॥ १३॥
यत्सर्वतो वदनवत्सर्वतः करणाच्छिरः ।
सर्वतो नयनश्रोत्रं तद्धि ब्रह्म नमाम्यहम् ॥ १४॥
यद्विचारवतो नृणां बन्धोऽनादि तमोभवः ।
सद्यो नश्यति शारीरस्तद्धि ब्रह्म नमाम्यहम् ॥ १५॥
यस्याज्ञयानिलार्केन्दुमृत्युवह्निग्रहादयः ।
स्वकर्मसु वर्तन्ते तद्धि ब्रह्म नमाम्यहम् ॥ १६॥
यन्नाम मङ्गलतमं मङ्गलानामनुत्तमम् ।
स्तुतिभिः स्तूयते वेदैस्तद्धि ब्रह्म नमाम्यहम् ॥ १७॥
यस्याऽत्मतां विदां मृत्युरनादि म्रियते क्षणात् ।
मृत्युमारणमापूर्णं तद्धि ब्रह्म नमाम्यहम् ॥ १८॥
निषिध्य सर्वलोकेऽस्मिन् यच्छेषमुपलभ्यते ।
सत्तामात्रमनिर्देश्यं तद्धि ब्रह्म नमाम्यहम् ॥ १९॥
पूर्णमन्तं बहिः पूर्णं येन पूर्णेन पूर्यते ।
पूर्णस्य पूर्णमाकाशं तद्धि ब्रह्म नमाम्यहम् ॥ २०॥
उग्रं वीरं महाविष्णुं ज्वलन्तं सर्वतो मुखम् ।
नृसिंहं भीषणं भद्रं मृत्युमृत्युं नमाम्यहम् ॥ २१॥
इति नृसिंहपुराणे शिवपार्वतीसंवादे पिशाचमोचनस्तोत्रं सम्पूर्णम् ।
Proofread by M K Barman