Shri Shri Prema Dhama Deva Stotram

 श्रीश्रीप्रेमधामदेवस्तोत्रम् 

देव-सिद्ध-मुक्त-युक्त-भक्त-वृन्द-वन्दितं
पाप-ताप-दाव-दाह-दग्ध-दुःख-खण्डितम् ।
कृष्ण-नाम-सीधु-धाम-धन्य-दान-सागरं
प्रेम-धाम-देवमेव नौमि गौर-सुन्दरम् ॥ १॥

स्वर्ण-कोटि-दर्पणाभ-देह-वर्ण-गौरवं
पद्म-पारिजात-गन्ध-वन्दिताङ्ग-सौरभम् ।
कोटि-काम-मूर्च्छिताङ्घ्रि-रूप-रास-रङ्गरं
प्रेम-धाम-देवमेव नौमि गौर-सुन्दरम् ॥ २॥

प्रेम-नाम-दान-जन्य-पञ्च-तत्त्वकात्मकं
साङ्ग-दिव्य-पार्षदास्त्र-वैभवावतारकम् ।
श्याम-गौर-नाम-गान-नृत्य-मत्त-नागरं
प्रेम-धाम-देवमेव नौमि गौर-सुन्दरम् ॥ ३॥

शान्ति-पुर्यधीश-कल्यधर्म-दुःख-दुःसहं
जीव-दुःख-हान-भक्त-सौख्यदान-विग्रहम् ।
कल्यघौघ-नाश-कृष्ण-नाम-सीधु-सञ्चरं
प्रेम-धाम-देवमेव नौमि गौर-सुन्दरम् ॥ ४॥

द्वीप-नव्य-गाङ्ग-बङ्ग-जन्म-कर्म-दर्शितं
श्रीनिवास-वास-धन्य-नाम-रास-हर्षितम् ।
श्री हरिप्रियेश-पूज्यधी-शची-पुरन्दरं
प्रेम-धाम-देवमेव नौमि गौर-सुन्दरम् ॥ ५॥

श्री शची-दुलाल-बाल्य-बाल-सङ्ग-चन्चलं
आकुमार-सर्व-शास्त्र-दक्ष-तर्क-मङ्गलम् ।
छात्र-सङ्ग-रङ्ग-दिग्जिगीषु-दर्प-संहरं
प्रेम-धाम-देवमेव नौमि गौर-सुन्दरम् ॥ ६॥

वर्ज्य-पात्र-सारमेय-सर्प-सङ्ग-खेलनं
स्कन्ध-वाहि-चौर-तीर्थ-विप्र-चित्र-लीलनम् ।
कृष्ण-नाम-मात्र-बाल्य-कोप-शान्ति सौकरं
प्रेम-धाम-देवमेव नौमि गौर-सुन्दरम् ॥ ७॥

स्नान-गाङ्ग-वारि-बाल-सङ्ग-रङ्ग-खेलनं
बालिकादि-पारिहास्य-भङ्गि-बाल्य-लीलनम् ।
कूत-तर्क-छात्र-शिक्षकादि-वाद-तत्परं
प्रेम-धाम-देवमेव नौमि गौर-सुन्दरम् ॥ ८॥

श्री निमै-पण्डितेति-नाम-देश-वन्दितं
नव्य-तर्क-दक्ष-लक्ष-दम्भि-दम्भ-खण्डितम् ।
स्थापितार्थ-खण्ड-खण्ड-खण्डितार्थ-सम्भरं
प्रेम-धाम-देवमेव नौमि गौर-सुन्दरम् ॥ ९॥

श्लोक-गाङ्ग-वन्दनार्थ-दिग्जिगीषु-भाषितं
व्यत्यलङ्कृतादि-दोष-तर्कितार्थ-दूषितम् ।
ध्वस्त-युक्ति-रुद्ध-बुद्धि-दत्त-धीमदादरं
प्रेम-धाम-देवमेव नौमि गौर-सुन्दरम् ॥ १०॥

सूत्र-वृत्ति-टिप्पनीष्ट-सूक्ष्म-वाचनाद्भुतं
धातु-मात्र-कृष्ण-शक्ति-सर्व-विश्व-सम्भृतम् ।
रुद्ध-बुद्धि-पण्डितौघ-नान्य-युक्ति-निर्धरं
प्रेम-धाम-देवमेव नौमि गौर-सुन्दरम् ॥ ११॥

कृष्ण-दृष्टि-पात-हेतु-शव्दकार्थ-योजनं
स्फोट-वाद-श‍ृङ्खलैक-भित्ति-कृष्ण-बीक्षणम् ।
स्थूल-सूक्ष्म-मूल-लक्ष्य-कृष्ण-सौख्य-सम्भरं
प्रेम-धाम-देवमेव नौमि गौर-सुन्दरम् ॥ १२॥

प्रेम-रङ्ग-पाठ-भङ्ग-छात्र-काकु-कातरं
छात्र-सङ्ग-हस्त-ताल-कीर्तनाद्य-सञ्चरम् ।
कृष्ण-नाम-सीधु-सिन्धु-मग्न-दिक्-चराचरं
प्रेम-धाम-देवमेव नौमि गौर-सुन्दरम् ॥ १३॥

आर्य-धर्म-पाल-लब्ध-दीक्ष-कृष्ण-कीर्तनं
लक्ष-लक्ष-भक्त-गीत-वाद्य-दिव्य-नर्तनम् ।
धर्म-कर्म-नाश-दस्यु-दुष्ट-दुष्कृटोद्धरं
प्रेम-धाम-देवमेव नौमि गौर-सुन्दरम् ॥ १४॥

म्लेच्छ-राज-नाम-बाध-भक्त-भीति-भञ्जनं
लक्ष-लक्ष-दीप-नैश-कोटि-कण्ठ-कीर्तनम् ।
श्री-मृदङ्ग-ताल-वाद्य-नृत्य-काजि-निस्तरं
प्रेम-धाम-देवमेव नौमि गौर-सुन्दरम् ॥ १५॥

लक्ष-लोचनाश्रु-वर्ष-हर्ष-केश-कर्तनं
कोटि-कण्ठ-कृष्ण-कीर्तनाध्य-दण्ड-धारनम् ।
न्यासि-वेश-सर्व-देश-हा-हुताश-कातरं
प्रेम-धाम-देवमेव नौमि गौर-सुन्दरम् ॥ १६॥

श्री-यतीश-भक्त-वेश-राढ-देश-चारनं
कृष्ण-चैतन्याख्य-कृष्ण-नाम-जीव-तारनम् ।
भाव-विभ्रमात्म-मत्त-धावमान-भूधरं
प्रेम-धाम-देवमेव नौमि गौर-सुन्दरम् ॥ १७॥

श्री-गदाधरादि-नित्यानन्द-सङ्ग-वर्धनं
अद्वयाख्य-भक्त-मुख्य-वाञ्छितार्थ-साधनम् ।
क्षेत्रवास-साभिलाष-मातृतोष-तत्परं
प्रेम-धाम-देवमेव नौमि गौर-सुन्दरम् ॥ १८॥

न्यासिराज-नील-शैल-वास-सार्वभौमपं
दाक्षिनात्य-तीर्थ-जात-भक्त-कल्प-पादपम् ।
राम-मेघ-राग-भक्ति-वृष्ति-शक्ति-सञ्चरं
प्रेम-धाम-देवमेव नौमि गौर-सुन्दरम् ॥ १९॥

ध्वस्त-सार्वभौम-वाद-नव्य-तर्क-शाङ्करं
ध्वस्त-तद्विवर्त-वाद-दानवीय-डम्वरम् ।
दर्शितार्थ-सर्व-शास्त्र-कृष्ण-भक्ति-मन्दिरं
प्रेम-धाम-देवमेव नौमि गौर-सुन्दरम् ॥ २०॥

प्रेम-धाम-दिव्य-दीर्घ-देह-देव-नन्दितं
हेम-कञ्ज-पुञ्ज-निन्दि-कान्ति-चन्द्र-वन्दितम् ।
नाम-गान-नृत्य-नव्य-दिव्य-भाव-मन्दिरं
प्रेम-धाम-देवमेव नौमि गौर-सुन्दरम् ॥ २१॥

कृष्ण-कृष्ण-कृष्ण-कृष्ण-कृष्ण-नाम-कीर्तनं
राम-राम-गान-रम्य-दिव्य-छन्द-नर्तनम् ।
यत्र-तत्र-कृष्ण-नाम-दान-लोक-निस्तरं
प्रेम-धाम-देवमेव नौमि गौर-सुन्दरम् ॥ २२॥

गोदवर्य-वाम-तीर-रामानन्द-संवदं
ज्ञान-कर्म-मुक्त-मर्म-राग-भक्ति-सम्पदम् ।
पारकीय-कान्त-कृष्ण-भाव-सेवनाकरं
प्रेम-धाम-देवमेव नौमि गौर-सुन्दरम् ॥ २३॥

दास्य-सख्य-वात्स्य-कान्त-सेवनोत्तरोत्तरं
श्रेष्ठ-पारकीय-राधिकाङ्घ्रि-भक्ति-सुन्दरम् ।
श्रीव्रज-स्वसिद्ध-दिव्य-काम-कृष्ण-तत्परं
प्रेम-धाम-देवमेव नौमि गौर-सुन्दरम् ॥ २४॥

शान्त-मुक्त-भृत्य-तृप्त-मित्र-मत्त-दर्शितं
स्निग्ध-मुग्ध-शिष्ट-मिष्ट-सुष्ठ-कुण्ठ-हर्षितम् ।
तन्त्र-मुक्त-वाम्य-राग-सर्व-सेवनोत्तरं
प्रेम-धाम-देवमेव नौमि गौर-सुन्दरम् ॥ २५॥

आत्म-नव्य-तत्त्व-दिव्य-राय-भाग्य-दर्शितं
श्याम-गोप-राधिकाप्त-कोक्त-गुप्त-चेष्टितम् ।
मुर्च्छिताङ्घ्रि-रामराय-बोधितात्म-किङ्करं
प्रेम-धाम-देवमेव नौमि गौर-सुन्दरम् ॥ २६॥

नष्ट-कुष्ठ-कूर्म-विप्र-रूप-भक्ति-तोषणम्
आमदास-विप्र-मोह-मुक्त-भक्त-पोषणम् ।
काल-कृष्ण-दास-मुक्त-भट्टथारि-पिञ्जरं
प्रेम-धाम देवमेव नौमि गौर-सुन्दरम् ॥ २७॥

रङ्गनाथ-भट्ट-भक्ति-तुष्ट-भङ्गि-भाशणं
लक्ष्म्यगम्य-कृष्ण-रास-गोपिकैक-पोषणम् ।
लक्ष्म्यभीष्ट-कृष्ण-शीर्ष-साध्य-साधनाकरं
प्रेम-धाम-देवमेव नौमि गौर-सुन्दरम् ॥ २८॥

ब्रह्म-संहिताख्य-कृष्ण-भक्ति-शास्त्र-दायकं
कृष्ण-कर्ण-सीधु-नाम-कृष्ण-काव्य-गायकम् ।
श्रीप्रतापरुद्र-राज-शीर्ष-सेव्य-मन्दिरं
प्रेम-धाम-देवमेव नौमि गौर-सुन्दरम् ॥ २९॥

श्रीरथाग्र-भक्त-गीत-दिव्य-नर्त्तनाद्भुतं
यात्रि-पात्र-मित्र-रुद्रराज-हृच्-चमत्कृतम् ।
गुण्डिचागमादि-तत्त्व-रूप-काव्य-सञ्चरं
प्रेम-धाम-देवमेव नौमि गौर-सुन्दरम् ॥ ३०॥

प्रेम-मुग्ध-रुद्र-राज-शौर्य-विर्य-विक्रमं
प्रार्थिताङ्घ्रि-वर्जितान्य-सर्व-धर्म-सङ्गमम् ।
लुण्ठित-प्रताप-शीर्ष-पाद-धूलि-धूसरं
प्रेम-धाम-देवमेव नौमि गौर-सुन्दरम् ॥ ३१॥

दाक्षिनात्य-सुप्रसिद्ध-पण्डितौघ-पूजितं
श्रेष्ठ-राज-राजपात्र-शीर्ष-भक्ति-भूषितम् ।
देश-मातृ-शेष-दर्शनार्थि-गौर-गोचरं
प्रेम-धाम-देवमेव नौमि गौर-सुन्दरम् ॥ ३२॥

गौर-गर्वि-सर्व-गौड-गौरबार्थ-सज्जितं
शाष्त्र-शाष्त्र-दक्ष-दुष्ट-नास्तिकादि-लज्जितम् ।
मुह्यमान-मातृकादि-देह-जीव-सञ्चरं
प्रेम-धाम-देवमेव नौमि गौर-सुन्दरम् ॥ ३३॥

न्यास-पञ्च-वर्ष-पूर्ण-जन्म-भूमि-दर्शनं
कोटि-कोटि-लोक-लुब्ध-मुग्ध-दृष्टि-कर्षणम् ।
कोटि-कण्ठ-कृष्ण-नाम-घोष-भेदिताम्बरं
प्रेम-धाम-देवमेव नौमि गौर-सुन्दरम् ॥ ३४॥

आर्त-भक्त-शोक-शान्ति-तापि-पापि-पावनं
लक्ष-कोटि-लोक-सङ्ग-कृष्ण-धाम-धावनम् ।
राम-केलि-साग्रजात-रूप-कर्षणादरं
प्रेम-धाम-देवमेव नौमि गौर-सुन्दरम् ॥ ३५॥

व्याघ्र-वारणैन-वन्य-जन्तु-कृष्ण-गायकं
प्रेम-नृत्य-भाव-मत्त-झाडखण्ड-नायकम् ।
दुर्ग-वन्य-मार्ग-भट्ट-मात्र-सङ्ग-सौकरं
प्रेम-धाम-देवमेव नौमि गौर-सुन्दरम् ॥ ३६॥

गाङ्ग-यामुनादि-बिन्दु-माधवादि-माननं
माथुरार्त्त-चित्त-यामुनाग्र-भाग-धावनम् ।
स्मारित-व्रजाति-तीव्र-विप्रलम्भ-कातरं
प्रेम-धाम-देवमेव नौमि गौर-सुन्दरम् ॥ ३७॥

माधवेन्द्र-विप्रलम्भ-माथुरेष्ट-माननं
प्रेम-धाम-दृष्टकाम-पूर्व-कुञ्ज-काननम् ।
गोकुलादि-गोष्ठ-गोप-गोपिका-प्रियङ्करं
प्रेम-धाम-देवमेव नौमि गौर-सुन्दरम् ॥ ३८॥

प्रेम-गुञ्जनालि-पुञ्ज-पुष्प-पुञ्ज-रञ्जितं
गीत-नृत्य-दक्ष-पक्षि-वृक्ष-लक्ष-वन्दितम् ।
गो-वृषादि-नाद-दीप्त-पूर्व-मोद-मेदुरं
प्रेम-धाम-देवमेव नौमि गौर-सुन्दरम् ॥ ३९॥

प्रेम-बुद्ध-रुद्ध-बुद्धि-मत्त-नृत्य-कीर्त्तनं
प्लाविताश्रु-काञ्चनाङ्ग-वास-चातुरङ्गनम् ।
कृष्ण-कृष्ण-राव-भाव-हास्य-लास्य-भास्वरं
प्रेम-धाम-देवमेव नौमि गौर-सुन्दरम् ॥ ४०॥

प्रेम-मुग्ध-नृत्य-कीर्त्तनाकुलारिटान्तिकं
स्नान-धन्य-वारि-धान्य-भूमि-कुण्ड-देशकम् ।
प्रेम-कुण्ड-राधिकाख्य-शास्त्र-वन्दनादरं
प्रेम-धाम-देवमेव नौमि गौर-सुन्दरम् ॥ ४१॥

तिन्तिडी-तलस्थ-यामुनोर्म्मि-भावनाप्लुतं
निर्जनैक-राधिकात्म-भाव-वैभवावृतम् ।
श्याम-राधिकाप्त-गौर-तत्त्व-भित्तिकाकरं
प्रेम-धाम-देवमेव नौमि गौर-सुन्दरम् ॥ ४२॥

शारिका-शुकोक्ति-कौतुकाढ्य-लास्य-लापितं
राधिका-व्यतीत-कामदेव-काम-मोहितम् ।
प्रेम-वश्य-कृष्ण-भाव-भक्त-हृच्-चमत्करं
प्रेम-धाम-देवमेव नौमि गौर-सुन्दरम् ॥ ४३॥

श्री-प्रयाग-धाम-रूप-राग-भक्ति-सञ्चरं
श्री-सनातनादि-काशि-भक्ति-शिक्षणादरम् ।
वैष्णवानुरोध-भेद-निर्विशेष-पञ्जरं
प्रेम-धाम-देवमेव नौमि गौर-सुन्दरम् ॥ ४४॥

न्यासि-लक्ष-नायक-प्रकाशानन्द-तारकं
न्यासि-राशि-काशि-वासि-कृष्ण-नाम-पारकम् ।
व्यास-नारदादि-दत्त-वेदधी-धुरन्धरं
प्रेम-धाम-देवमेव नौमि गौर-सुन्दरम् ॥ ४५॥

ब्रह्म-सूत्र-भाष्य-कृष्ण-नारदोपदेशकं
श्लोक-तुर्य-भाषणान्त-कृष्ण-सम्प्रकाशकम् ।
शब्द-वर्त्तनान्त-हेतु-नाम-जीव-निस्तरं
प्रेम-धाम-देवमेव नौमि गौर-सुन्दरम् ॥ ४६॥

आत्म-राम-वाचनादि-निर्विशेष-खण्डनं
श्रौत-वाक्य-सार्थकैक-चिद्विलास-मण्डनम् ।
दिव्य-कृष्ण-विग्रहादि-गौण-बुद्धि-धिक्करं
प्रेम-धाम-देवमेव नौमि गौर-सुन्दरम् ॥ ४७॥

ब्रह्म-पारमात्म्य-लक्षणाद्वयैक-वाचनं
श्री-व्रज-स्वसिद्ध-नन्द-लील-नन्द-नन्दनम् ।
श्री-रस-स्वरूप-रास-लील-गोप-सुन्दरं
प्रेम-धाम-देवमेव नौमि गौर-सुन्दरम् ॥ ४८॥

राधिका-विनोद-मात्र-तत्त्व-लक्षणान्वयं
साधु-सङ्ग-कृष्ण-नाम-साधनैक-निश्चयम् ।
प्रेम-सेवनैक-मात्र-साध्य-कृष्ण-तत्परं
प्रेम-धाम-देवमेव नौमि गौर-सुन्दरम् ॥ ४९॥

आत्म-राम-वाचनैक-षष्टिकार्थ-दर्शितं
रुद्र-संख्य-शब्द-जात-यद्-यद्-अर्थ-सम्भृतम् ।
सर्व-सर्व-युक्त-तत्-तद्-अर्थ-भुरिदाकरं
प्रेम-धाम-देवमेव नौमि गौर-सुन्दरम् ॥ ५०॥

श्री सनातनानु-रूप-जीव-सम्प्रदायकं
लुप्त-तीर्थ-शुद्ध-भक्ति-शास्त्र-सुप्रचारकम् ।
नील-शैल-नाथ-पीठ-नैज-कार्य-सौकरं
प्रेम-धाम-देवमेव नौमि गौर-सुन्दरम् ॥ ५१॥

त्याग-बाह्य-भोग-बुद्धि-तीव्र-दण्ड-निन्दनं
राय-शुद्ध-कृष्ण-काम-सेवनाभि-नन्दनम् ।
राय-राग-सेवनोक्त-भाग्य-कोटि-दुष्करं
प्रेम-धाम-देवमेव नौमि गौर-सुन्दरम् ॥ ५२॥

श्री-प्रयाग-भट्ट-वल्लभैक-निष्ठ-सेवनं
नील-शैल-भट्ट-दत्त-राग-मार्ग-राधनम् ।
श्री गदाधरार्पिताधिकार-मन्त्र-माधुरं
प्रेम-धाम-देवमेव नौमि गौर-सुन्दरम् ॥ ५३॥

श्री-स्वरूप-राय-सङ्ग-गाम्भिरान्त्य-लीलनं
द्वादशाब्द-वह्नि-गर्भ-विप्रलम्भ-शीलनम् ।
राधिकाधिरूढ-भाव-कान्ति-कृष्ण-कुञ्जरं
प्रेम-धाम-देवमेव नौमि गौर-सुन्दरम् ॥ ५४॥

श्री-स्वरूप-कण्ठ-लग्न-माथुर-प्रलापकं
राधिकानु-वेदनार्त्त-तीव्र-विप्रलम्भकम् ।
स्वप्नवत्-समाधि-दृष्ट-दिव्य-वर्णनातुरं
प्रेम-धाम-देवमेव नौमि गौर-सुन्दरम् ॥ ५५॥

सात्विकादि-भाव-चिह्न-देह-दिव्य-सौष्ठवं
कूर्म-धर्म-भिन्न-सन्धि-गात्र-पुष्प-पेलवम् ।
ह्रस्व-दीर्घ-पद्म-गन्ध-रक्त-पीत-पाण्डुरं
प्रेम-धाम-देवमेव नौमि गौर-सुन्दरम् ॥ ५६॥

तीव्र-विप्रलम्भ-मुग्ध-मन्दिराग्र-धावितं
कूर्म-रूप-दिव्य-गन्ध-लुब्ध-धेनु-वेष्टितम् ।
वर्णितालि-कूल-कृष्ण-केलि-शैल-कन्दरं
प्रेम-धाम-देवमेव नौमि गौर-सुन्दरम् ॥ ५७॥

इन्दु-सिन्धु-नृत्य-दीप्त-कृष्ण-केलि-मोहितं
ऊर्मि-शीर्ष-सुप्त-देह-वात-रङ्ग-वाहितम् ।
यामुनालि-कृष्ण-केलि-मग्न-सौख्य-सागरं
प्रेम-धाम-देवमेव नौमि गौर-सुन्दरम् ॥ ५८॥

रात्रि-शेष-सौम्य-वेश-शायितार्द्र-सैकतं
भिन्न-सन्धि-दीर्घ-देह-पेलवाति-दैवतम् ।
श्रान्त-भक्त-चक्रतीर्थ-हृष्ट-दृष्टि-गोचरं
प्रेम-धाम-देवमेव नौमि गौर-सुन्दरम् ॥ ५९॥

आर्त्त-भक्त-कण्ठ-कृष्ण-नाम-कर्ण-हृद्गतं
लग्न-सन्धि-सुष्ठु-देह-सर्व-पूर्व-सम्मतम् ।
अर्ध-बाह्य-भाव-कृष्ण-केलि-वर्णनातुरं
प्रेम-धाम-देवमेव नौमि गौर-सुन्दरम् ॥ ६०॥

यामुनाम्बु-कृष्ण-राधिकालि-केलि-मण्डलं
व्यक्त-गुप्त-दृप्त-तृप्त-भङ्गि-मादनाकुलम् ।
गूढ-दिव्य-मर्म-मोद-मूर्च्छना-चमत्करं
प्रेम-धाम-देवमेव नौमि गौर-सुन्दरम् ॥ ६१॥

आस्य-घर्षणादि-चाटकाद्रि-सिन्धु-लीलनं
भक्त-मर्म-भेदि-तीव्र-दुःख-सौक्य-खेलनम् ।
अत्यचिन्त्य-दिव्य-वैभवाश्रितैक-शङ्करं
प्रेम-धाम-देवमेव नौमि गौर-सुन्दरम् ॥ ६२॥

श्रोत्र-नेत्र-गत्यतीत-बोध-रोधिताद्भुतं
प्रेम-लभ्य-भाव-सिद्ध-चेतना-चमत्कृतम् ।
ब्रह्म-शम्भु-वेद-तन्त्र-मृग्य-सत्य-सुन्दरं
प्रेम-धाम-देवमेव नौमि गौर-सुन्दरम् ॥ ६३॥

विप्र-शूद्र-विज्ष-मूर्ख-यावनादि-नामदं
वित्त-विक्रमोच्च-नीच-सज्जनैक-सम्पदम् ।
स्त्री-पुमादि-निर्विवाद-सार्ववादिकोद्धरं
प्रेम-धाम-देवमेव नौमि गौर-सुन्दरम् ॥ ६४॥

सिन्धु-सून्य-वेद-चन्द्र-शाक-कुम्भ-पूर्णिमा
सान्ध्य-चान्द्रकोपराग-जात-गौर-चन्द्रमा ।
स्नान-दान-कृष्ण-नाम-सङ्ग-तत्-परात्परं
प्रेम-धाम-देवमेव नौमि गौर-सुन्दरम् ॥ ६५॥

आत्म-सिद्ध-सावलील-पूर्ण-सौख्य-लक्षणं
स्वानुभाव-मत्त-नृत्य-कीर्त्तनात्म-वण्टनम् ।
अद्वयैक-लक्ष्य-पूर्ण-तत्त्व-तत्-परात्परं
प्रेम-धाम-देवमेव नौमि गौर-सुन्दरम् ॥ ६६॥

श्री-पुरीश्वरानुकम्पि-लब्ध-दीक्ष-दैवतं
केशवाख्य-भारती-सकाश-केश-रक्षितम् ।
माधवानुधी-किशोर-कृष्ण-सेवनादरं
प्रेम-धाम-देवमेव नौमि गौर-सुन्दरम् ॥ ६७॥

सिन्धु-बिन्दु-वेद-चन्द्र-शाक-फाल्गुनोदितं
न्यास-सोम-नेत्र-वेद-चन्द्र-शाक-बोधितम् ।
वाण-वाण-वेद-चन्द्र-शाक-लोचनान्तरं
प्रेम-धाम-देवमेव नौमि गौर-सुन्दरम् ॥ ६८॥

श्री-स्वरूप-राय-सङ्ग-हर्ष-शेष-घोषणं
शिक्षणाष्टकाख्य-कृष्ण-कीर्त्तनैक-पोषणम् ।
प्रेम-नाम-मात्र-विश्व-जीवनैक-सम्भरं
प्रेम-धाम-देवमेव नौमिगौर-सुन्दरम् ॥ ६९॥

प्रेम हेम-देव देहि-दासरेष मन्यतां
क्षम्यतां महापराध-राशिरेष-गण्यताम् ।
रूप-किङ्करेषु रामानन्द-दास-सम्भरं
प्रेम-धाम-देवमेव नौमि गौर-सुन्दरम् ॥ ७०॥ ।
पञ्चमे शत-गौराब्दे श्री-सिद्धान्त-सरस्वती
श्रीधरः कोऽपि तच्छिष्यस्त्रिदण्डी-नौति-सुन्दरम् ॥ ७१॥

सश्रद्धः सप्त-दशकं प्रेम-धामेति-नामकम् ।
स्तवं कोऽपि पठन् गौरं राधा-श्याम-मयं व्रजेत् ॥ ७२॥

इति विष्णुपाद-श्रील-भक्तिरक्षक-श्रीधर-देवगोस्वामि-विरचितं
श्रीश्रीप्रेमधामदेवस्तोत्रं सम्पूर्णम् ।