Premavatikrita Shri Hari Stuti

 प्रेमवतीकृता श्रीहरिस्तुतिः 

निगमागमगीतदिव्यकीर्ते करुणाद्याखिलसद्गुणैकधामन् ।
धृतमानुषनाटने कृपालो त्वयि नित्यं मनसो गतिर्ममास्तु ॥ १॥

वरवक्त्रवितर्जिताब्जशोभे शुभनासापरिभूतकीरचञ्चौ ।
सहचन्द्रकपुण्ड्रशोभिभाले त्वयि नित्यं मनसो गतिर्ममास्तु ॥ २॥

अमितात्महितार्थमत्र नाथ करुणाविष्कृतनैजदिव्यमूर्ते ।
अवितर्क्यमनोहरस्वरूपे त्वयि नित्यं मनसो गतिर्ममास्तु ॥ ३॥

निजभक्तमदादिशत्रुहारिन् निजभक्ताखिलकष्टनाशकारिन् ।
निगमागमशास्त्रसारवक्तस्त्वयि नित्यं मनसो गतिर्ममास्तु ॥ ४॥

शरणागतरक्ष यत्कथायाः श्रवणं च स्मरणं यदीयमूर्तेः ।
प्रपुनाति जनान् द्रुतं सुपापास्त्वयि नित्यं मनसो गतिर्ममास्तु ॥ ५॥

हरिकृष्ण हरे प्रभो परात्मन्निति नामानि जपञ्जनोऽपि नीचः ।
वरवर्णतमो भवेच्च यस्य त्वयि नित्यं मनसो गतिर्ममास्तु ॥ ६॥

अपि वर्णिवरात्मनाथ सर्वगुणधामन् पुरुषोत्तम स्वतन्त्र ।
वयुनादिवरैश्वराम्बुराशे त्वयि नित्यं मनसो गतिर्ममास्तु ॥ ७॥

न हि यस्य परः कदापि कश्चित् प्रभवेत् कः कुत एव तेन तुल्यः ।
इति कल्पनशक्त्यमेयशक्ते त्वयि नित्यं मनसो गतिर्ममास्तु ॥ ८॥

इति श्रीस्वामिनारायणबापाचरित्रामृतसागरे प्रथमप्रवाहे ।
एकपञ्चाशत्तमे तरङ्गे प्रेमवतीकृता श्रीहरिस्तुतिः सम्पूर्णा ।