Raja Indradyutikritam Krishnanarayana Stotram

 राजा इन्द्रद्युतिकृतं कृष्णनारायणस्तोत्रम् 

तद्भक्त्याऽनुग्रहं कुर्वन् साक्षात् कृष्णनारायणः ।
प्रादुरासीत् पीतवासाः किशोरश्च जगन्मयः ॥ २०॥

इन्द्रद्युतिर्हरिं वीक्ष्य नेमे तुष्टाव तं प्रभुम् ।
कृष्णनारायण विष्णो पुरुषोत्तम केशव ॥ २१॥

अनादिश्रीहरे स्वामिन् हृषीकेश च ते नमः ।
विश्वात्मन् सृष्टिकृत्कृष्णानन्तशक्ते च ते नमः ॥ २२॥

निर्गुणानन्तदिव्यानां गुणानां पूर्णमूर्तिक ।
ज्ञानगम्य कृपालभ्य पुरुषोत्तम ते नमः ॥ २३॥

अनन्तमूर्तये तुभ्यं नमोऽस्त्वानन्दरूपिणे ।
नमस्ते परमेशाय ब्रह्मणे परमात्मने ॥ २४॥

त्वं पिता सर्वभूतानां माता बन्धुः सुहृत्सखा ।
त्वमक्षरं परं धाम चिन्मात्रं व्योम वै बृहत् ॥ २५॥

सर्वस्याधारमव्यक्तमनन्तं तमसः परम् ।
त्वां पश्यन्ति परात्मानं ज्ञानदीपेन सेवकाः ॥ २६॥

प्रपद्ये तं भवेद्रूपं सच्चिदानन्दविग्रहम् ।
यत्रास्ते भगवाँस्तद्वै श्रीहरेः परमं पदम् ॥ २७॥

त्वमेव नयसि श्रीमत्कृष्णनारायणप्रभो ।
ज्ञानं देहि पदं देहि त्वन्माया मा प्रदेहि मे ॥ २८॥

इत्युक्त्वा प्रपतन्तं तं पादयोः स्वकरेण ह ।
पस्पर्श प्रहसन् कृष्णनारायणः पुनः पुनः ॥ २९॥

इति श्रीलक्ष्मीनारायणीयसंहिता । खण्ड २। अध्याय ७१-अध्यायान्तर्गतं
राजा इन्द्रद्युतिकृतं कृष्णनारायणस्तोत्रं सम्पूर्णम् ।

लक्ष्मीनारायणीयसंहिता । खण्ड २। अध्याय ७१/२०-२९॥


lakShmInArAyaNIyasaMhitA . khaNDa 2. adhyAya 71/20-29..

Proofread by PSA Easwaran