Rajna Prajabhishcha Kritam Krishnarayanabhajanam

राज्ञा प्रजाभिश्च कृतं कृष्णारायणभजनम्

माधवाख्ये मम मासे राजा चकार कीर्तनम् । मासिकं चाऽखण्डितं च त्रिंशद्दिनं मखात्मकम् ॥ ४६॥ ``हरे नारायण विष्णो कृष्ण केशव माधव । परब्रह्म प्रभो श्रीश पुरुषोत्तम सत्पते'' ॥ ४७॥ ``नमोऽनादिकृष्णनारायणाय परमात्मने । नमोऽन्तरात्मने साधुस्वरूपायाऽखिलात्मने'' ॥ ४८॥ ``नमः साध्वीस्वरूपाय श्रीकान्ताय सदात्मने । नमो भक्तिप्रलभ्याय सेवासाध्याय चक्रिणे'' ॥ ४९॥ ``स्वतन्त्रस्त्वं चाऽक्षरेशो वर्तसे मुक्तकोटिषु । तथाऽत्रायाहि साक्षाद्वै दिव्यमूर्तिर्यथाऽसि नः'' ॥ ५०॥ इत्येवं भजनं चक्रुः राजा प्रजाश्च साधवः । तैः सहाऽहं कीर्तयामि नृत्यामि च हसामि च ॥ ५१॥ इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे २९-अध्यायान्तर्गतं राज्ञा प्रजाभिश्च कृतं कृष्णारायणभजनं सम्पूर्णम् । लक्ष्मीनारायणीयसंहिता । खण्ड ३। अध्याय २९/४६-५१॥ lakShmInArAyaNIyasaMhitA . khaNDa 3. adhyAya 29/46-51.. Proofread by PSA Easwaran