Ramanujakhyadvijakritam Venkatesha Stotram

रामानुजाख्यद्विजकृतं वेङ्कटेशस्तोत्रम्

वेङ्कटेशं दयालुं तं तुष्टाव तापसो द्विजः । नमो रामाय चक्रादिधारिणे महते नमः ॥ ७७॥ नित्यशुद्धस्वरूपाय नमो भक्तार्तिहारिणे । परव्यूहविभवायाऽर्चादिरूपाय ते नमः ॥ ७८॥ अन्तर्यामिस्वरूपात्मव्यापिने ते नमो नमः । श्रीकृष्णाय महाभूम्ने नारायणाय ते नमः ॥ ७९॥ नमो हिरण्यगर्भाय वैराजाय च वेधसे । सदाशिवाय कान्ताय विष्णवे ब्रह्मणे नमः ॥ ८०॥ ईश्वरेशायेश्वराय पुष्पवन्नेत्रिणे नमः । नामजात्यादिपाराय नामजात्यादिरूपिणे ॥ ८१॥ काम्भरेयाय कृष्णाय गोपीमण्डलरासिने । गोपालजाय गोसेवास्निग्धाय ते नमो नमः ॥ ८२॥ वेदान्तन्यायवेद्याय भाष्याय भाष्यकारिणे । आगमान्तःसुगतये लोकरक्षाय ते नमः ॥ ८३॥ सौराष्ट्राऽऽविःस्वरूपाय रैवताचलवासिने । अश्वपट्टक्षितीशाय पुष्करारण्यशालिने ॥ ८४॥ काशेश्वराय रङ्गादिपूजिताय च ते नमः । इति स्तुत्वा श्रीनिवासं रामानुज इयाय शम् ॥ ८५॥ इति श्रीलक्ष्मीनारायणीयसंहितायां प्रथमे कृतयुगसन्ताने ४०३-अध्यायान्तर्गतं रामानुजाख्यद्विजकृतं वेङ्कटेशस्तोत्रं सम्पूर्णम् । लक्ष्मीनारायणीयसंहिता । खण्ड १। अध्याय ४०३/७७-८५॥ lakShmInArAyaNIyasaMhitA . khaNDa 1. adhyAya 403/77-85.. Proofread by PSA Easwaran