Ramanujakritam Venkatesha Stotram

रामानुजकृतं वेङ्कटेशस्तोत्रम्

रामानुज उवाच । नमो देवाधिदेवाय शङ्खचक्रगदाभृते । नमो नित्याय शुद्धाय वेङ्कटशाय ते नमः ॥ १६॥ नमो भक्तार्तिहन्त्रे ते हव्यकव्यस्वरूपिणे । नमस्त्रिमूर्तये तुभ्यं सृष्टिस्थित्यन्तकारिणे ॥ १७॥ नमः परेशाय नमोऽतिभूम्ने नमोऽस्तु लक्ष्मीपतये विधात्रे । नमोऽस्तु सूर्येन्दुविलोचनाय नमो विरिञ्चाद्यभिवन्दिताय ॥ १८॥ यो नामजात्यादिविकल्पहीनः समस्तदोषैरपि वर्जितो यः । समस्तसंसारभयापहारिणे तस्मै नमो दैत्यविनाशकाय ॥ १९॥ वेदान्तवेद्याय रमेश्वराय वृषादिवासाय विधातृपित्रे । नमो नमः सर्वजनार्तिहारिणे नारायणायामितविक्रमाय ॥ १.२१.२०॥ नमस्तुभ्यं भगवते वासुदेवाय शार्ङ्गिणे । भूयो भूयो नमस्तुभ्यं वेङ्कटाद्रिनिवासिने ॥ २१॥ इति श्रीस्कन्दपुराणे वैष्णवखण्डे वेङ्कटाचलमाहात्म्ये एकविंशाध्यायान्तर्गतं रामानुजकृतं वेङ्कटेशस्तोत्रं समाप्तम् । स्कन्दपुराण । वैष्णवखण्ड । वेङ्कटखण्ड । अध्याय २१/१६-२१॥ skandapurANa . vaiShNavakhaNDa . venkaTakhaNDa . adhyAya 21/16-21.. Proofread by PSA Easwaran