Suryachandrabhyam Kritam Vishnu Stotram

सूर्यचन्द्राभ्यां कृतं विष्णुस्तोत्रम्

दृष्ट्वा तत्र जगन्नाथं शङ्खचक्रगदाधरम् । स्तुतिं तौ चक्रतुर्देवौ चन्द्रसूर्यौ यशस्विनि ॥ १७॥ नमो लोकत्रयाध्यक्ष स्वप्रभाजितभास्कर । नमो विष्णो नमो जिष्णो नमस्ते कैटभान्तक ॥ १८॥ नमः सर्वक्रियाकर्त्रे जगत्त्रात्रे च ते नमः । नमश्चक्रायुधाधृष्य नमो दानवघातिने ॥ १९॥ नमः क्रमत्रयाक्रान्तत्रैलोक्यान्तर्हितोद्भव । नमः प्रचण्डदैत्येन्द्रकुलकाल महाबल ॥ २.७२.२०॥ नमो नाभिह्रदोद्भूतपद्मगर्भमहाप्रभो । जनिताशेषलोकेशविरञ्चाय महाद्युते ॥ २१॥ अमरारिविनाशाय महासमरशालिने । नमस्ते विबुधाधीश शरणं भव नः प्रभो ॥ २२॥ इति श्रीस्कन्दपुराणे आवन्त्यखण्डे चतुरशीतिलिङ्गमाहात्म्ये द्विसप्ततितमाध्यायान्तर्गतं सूर्यचन्द्राभ्यां कृतं विष्णुस्तोत्रं समाप्तम् । स्कन्दपुराण । आवन्त्यखण्ड । चतुरशीतिखण्ड । अध्याय ७२/१८-२२॥ skandapurANa . AvantyakhaNDa . chaturashItikhaNDa . adhyAya 72/18-22.. Proofread by PSA Easwaran