Sutaproktam Vasudeva Stotram

सूतप्रोक्तं वासुदेवस्तोत्रम्

भगवान्वासुदेवश्च कीर्त्यतेऽत्र सनातनः । स हि सत्यमृतं चैव पवित्रं पुण्यमेव च ॥ १९३॥ शाश्वतं ब्रह्म परमं ध्रुवं ज्योतिः सनातनम् । यस्य दिव्यानि कर्माणि कथयन्ति मनीषिणः ॥ १९४॥ असत्सत्सदसच्चैव यस्माद्देवात्प्रवर्तते । सन्ततिश्च प्रवृत्तिश्च जन्म मृत्युः पुनर्भवः ॥ १९५॥ अध्यात्मं श्रूयते यच्च पञ्चभूतगुणात्मकम् । अव्यक्तादि परं यच्च स एव परिगीयते ॥ १९६॥ यत्तद्यतिवरा युक्ता ध्यानयोगबलान्विताः । प्रतिबिम्बमिवादर्शे पश्यन्त्यात्मन्यवस्थितम् ॥ १९७॥ श्रद्दधानः सदोद्युक्तः सत्यधर्मपरायणः । आसेवन्निममध्यायं नरः पापात्प्रमुच्यते ॥ १९८॥ इति महाभारते आदिपर्वणि १ अध्यायान्तर्गतं सूतप्रोक्तं वासुदेवस्तोत्रं सम्पूर्णम् । महाभारत । आदिपर्व । अध्याय १/१९३-१९८॥ mahAbhArata . Adiparva . adhyAya 1/193-198.. Proofread by PSA Easwaran