सती राणिकाकृतं कृष्णनारायणस्तोत्रम्
सतीं सत्यं प्रतुष्टाव तदा कृष्णनरायणम् ।
सत्याः सत्यं नित्यसत्यं नारायणं नमाम्यहम् ॥ ५२॥
ॐ नमो ब्रह्मसवित्रे सत्यानाथाय ते नमः ।
पातिव्रत्यस्वरूपाय पञ्चाग्नये च ते नमः ॥ ५३॥
त्रेताग्नये बीजस्वरूपाय च ते नमः ।
गर्भरूपाय बाल्याय युवरूपाय ते नमः ॥ ५४॥
कान्तायै चापि कान्ताय सवंशाय च ते नमः ।
युगलाय स्थविराय त्र्यात्मकाय च ते नमः ॥ ५५॥
नमो भगवते कृष्ण भगवत्यै च ते नमः ।
शीलरूपाय धर्माय धर्मलाभाय च ते नमः ॥ ५६॥
नमश्चितास्वरूपाय पतिरूपाय ते नमः ।
नमः पान्थस्य सार्थायाऽतिवाहिकायै ते नमः ॥ ५७॥
नमः सूर्याय मेघाय विद्युते शशिने नमः ।
नमो दिवास्वरूपाय निशारूपाय ते नमः ॥ ५८॥
अयनद्वयरूपाय नमो युगप्रवर्तिने ।
नमो दिवाय सत्याय नमो वैकुण्ठवासिने ॥ ५९॥
सतीनां पतये कृष्ण सतीलोकेशिने नमः ।
नमो गोलोककान्ताय नमोऽक्षरनिवासिने ॥ ६०॥
नमो मुक्तप्रपूज्याय सतां च पतये नमः ।
मुक्तेश्वरेशाय ब्रह्मप्रियेश ते नमः ॥ ६१॥
नमो माणिक्यमुक्तानां रमायाः पतये नमः ।
पद्मावतीसतीलक्ष्मीराधाश्रीपतये नमः ॥ ६२॥
सर्वेशाय परेशाय नमः श्रीपरमात्मने ।
लक्ष्मीशाय नमः श्रीपुरुषोत्तमाय ते नमः ॥ ६३॥
अनादिश्रीकृष्णनारायणाय स्वामिने नमः ।
अन्तर्यामिस्वरूपाय सयुजे ते नमो नमः ॥ ६४॥
गोपालनन्दनायेश कम्भराजाय ते नमः ।
अश्वपट्टस्य चन्द्राय मायासूर्याय ते नमः ॥ ६५॥
स्मृद्धिदाय विरागाय सर्वहर्त्रे च ते नमः ।
एषाऽहङ्गृहसंज्ञाऽस्मि गृहं सत्यं भवान्मम ॥ ६६॥
रक्षाङ्गारकनामा त्वं त्वत्परा गीश्च यावती ।
त्वां सहायं परं प्राप्य जुहोम्येनां गृहाण माम् ॥ ६७॥
विदित्वा चाऽविदित्वाऽपि सर्वं जुह्वति चान्ततः ।
उभयेन विधानाऽत्र होमो भवामि वै त्वयि ॥ ६८॥
त्वं यज्ञस्त्वं यज्ञकुण्डे चाहवनीयरूपवान् ।
गार्हपत्यस्वरूपस्त्वं चावसथ्यस्वरूपवान् ॥ ६९॥
यज्ञकुण्डाग्निरेवाऽसि सर्वकुण्डाग्निरेव च ।
नय मां सत्यधर्मेण सतीलोके कृपां कुरु ॥ ७०॥
सतीधर्मो हि नारीणां जगदुद्धारकारकः ।
सती दाक्षी पुरा जाता वह्निना त्वदहद्वपुः ॥ ७१॥
रेणुका च सती जाता शबरी चापि वै पुरा ।
कृतधर्माश्रिता नार्यः सतीत्वमुपयान्ति च ॥ ७२॥
तथाऽहं श्रीहरे कृष्ण सतीत्वमुपयामि च ।
इत्येवं भूपते सा तु कोमलाङ्गी हि राणिका ॥ ७३॥
चितामारुह्य यावच्चेन्धितुं वह्निं समिच्छति ।
तावच्छ्रीलोमशो देवश्चेशानश्च सुरादयः ॥ ७४॥
अनादिश्रीकृष्णनारायणो लक्ष्मीश्च गोचराः ।
अभवन् सन्निधौ तत्र सती नेमे समन्ततः ॥ ७५॥
सती त्वं जयमाप्नुहि सतीलोकं प्रगच्छसि ।
पत्या समं सुखं भुङ्क्ष्व यावत् स्वर्गं प्रविद्यते ॥ ७६॥
इत्युक्त्वा प्रददुराशीर्वादान् पुष्णाणि चन्दनम् ।
सती विष्णुं नमस्कृत्वा सस्मार च पुनः पतिम् ॥ ७७॥
इति श्रीलक्ष्मीनारायणीयसंहिता । खण्ड २। अध्याय २६७-अध्यायान्तर्गतं
सती राणिकाकृतं कृष्णनारायणस्तोत्रं सम्पूर्णम् ।
लक्ष्मीनारायणीयसंहिता । खण्ड २। अध्याय २६७/५२-७७॥
lakShmInArAyaNIyasaMhitA . khaNDa 2. adhyAya 267/52-77..
Proofread by PSA Easwaran