Shivakritam 3 Vishnu Stotram

शिवकृतं ३ विष्णुस्तोत्रम्

स प्राह मोहिनीं तत्र नारायणमृते क्वचित् । योगिनां मनसो धैर्यं हर्तुं शक्तो न वै परः ॥ ६०॥ तस्मै नमो भगवते मायारूपधाराय च । नमः कृष्णाय देवाय नारायणाय विष्णवे ॥ ६१॥ मोहिन्यात्मस्वरूपाय मोहरूपाय ते नमः । त्वयि नात्र मम शोको नारायणे परात्परे ॥ ६२॥ तथापि देवदेवेश रक्ष मायाविमोहनात् । मोहोऽयं जगतां बन्धकरोऽस्ति वासनोदयः ॥ ६३॥ तव योगोऽपि मोहात्मा मुक्त्यात्मा निर्गुणो मतः । तवेदं रूपमत्यर्हसौन्दर्यभाजनं परम् ॥ ६४॥ न मे चान्यस्य बन्धाय मोक्षमात्रप्रदं हि तत् । तस्मात्त्वया कृतं यद्वै तद्वै मे लाभदं परम् ॥ ६५॥ पार्वत्याः सहवासेऽपि स्मृत्वा त्वां मोहिनीं सदा । विनिर्बन्धो भविष्यामि लप्स्ये नैर्गुण्यमेव च ॥ ६६॥ श्रुत्वैतच्छम्भुहार्दज्ञो भगवान् कमलापतिः । योषिद्रूपं च संहृत्य चतुर्बाहुः क्षणेऽभवत् ॥ ६७॥ प्रहसन्प्राह सर्वात्मा समाश्लिष्य हरं हृदा । मद्भक्तो मत्कृतां मायां जितवानसि शङ्कर ॥ ६८॥ इति श्रीलक्ष्मीनारायणीयसंहितायां प्रथमे कृतयुगसन्ताने १९९-अध्यायान्तर्गतं शिवकृतं विष्णुस्तोत्रं सम्पूर्णम् । लक्ष्मीनारायणीयसंहिता । खण्ड १। अध्याय १९९/६०-६८॥ lakShmInArAyaNIyasaMhitA . khaNDa 1. adhyAya 199/60-68.. Proofread by PSA Easwaran