Svayambhu Stotram 2

स्वयम्भूस्तोत्रम् २

जगत्कृते स्वयम्भुवमनादिलीनमव्ययम् । तनोर्विपज्जरात्मकृत्स्वयम्भुवं नमाम्यहम् ॥ १॥ सहस्रपत्रपङ्कजं लसत्सुकर्णिकोद्भवम् । समस्तकामनाप्रदं स्वयम्भुवं नमाम्यहम् ॥ २॥ सहस्रभानुरञ्जनं नियुतचन्द्रनन्दनम् । सुरादिलोकवन्दनं स्वयम्भुवं नमाम्यहम् ॥ ३॥ त्वमेव राजसे गुणैर्भुवि स्थितो विराजसे । त्रिधातुक विभावसे स्वयम्भुवं नमाम्यहम् ॥ ४॥ अयं क इत्ययं हृदा मीमांसितुं न शक्तवान् । प्रघासमात्रमीक्षितः स्वयम्भुवं नमाम्यहम् ॥ ५॥ पठन्ति ये नरा मुदा स्वयम्भुवः स्तुतिं सदा । त्रिवर्गसिद्धिमाप्य ते लभन्ति मुक्तिमेव ताम् ॥ ६॥ इति श्रीबृहत्स्वयम्भूपुराणोद्धृतं शिखिनिर्मितं स्वयम्भूस्तोत्रं सम्पूर्णम् ॥