Shri Vrishanandana Ashtakam

श्रीवृषनन्दनाष्टकम्

(द्रुतविलम्बित वृत्तम्) वदनतर्जित-रम्य-हिमांशु के कमलकोमल-पत्रविलोचने । मदनमोहन-सुन्दर-विग्रहे भवहरेऽस्तु मनो वृषनन्दने ॥ १॥ मुनिसमाज-सदासन-संस्थिते पुरटनूपुर-रम्यपदाम्बुजे । उदरनाभि-वलित्रय-राजिते भवहरेऽस्तु मनो वृषनन्दने ॥ २॥ कुसुममाल-विशालभुजान्तरे मधुरहासविलास-मुखाम्बुजे । रुचिर-केसरचन्दन-चर्चिते भवहरेऽस्तु मनो वृषनन्दने ॥ ३॥ जघन-काञ्चन-भासुरमेखले ललितमौक्तिकहार-मनोहरे । कुटिल-मञ्जुलनील-शिरोरुहे भवहरेऽस्तु मनो वृषनन्दने ॥ ४॥ विशदचन्द्र-करप्रभ-शेखरे प्रणतपापविनाश-दिवाकरे । धृतवलक्ष-विशाल-घनाम्बरे भवहरेऽस्तु मनो वृषनन्दने ॥ ५॥ क्षपितभक्त-मनोभव-वेदने कनकभूषण-हारि-करद्वये । अरुणराग-शिरःपट-शोभिते भवहरेऽस्तु मनो वृषनन्दने ॥ ६॥ तिलकलक्षण-राजित-गण्डके श्रुतिसितेतर-बिन्दु-मनोहरे । श्रवणकुण्डल-शालि-कपोलके भवहरेऽस्तु मनो वृषनन्दने ॥ ७॥ मधुरवाक्य-सुधारस-पोषके निजजनोदित-योगरहस्यके । वदति संसदि कृष्ण-निरूपणं भवहरेऽस्तु मनो वृषनन्दने ॥ ८॥ श्री अचिन्न्यानन्दब्रह्मचारीविरचितं श्रीवृषनन्दनाष्टकं सम्पूर्णम् ।