वसिष्ठमुनिप्रोक्तं त्रैलोक्यविजयकवचस्तोत्रम्
सगर उवाच ।
श्रुतं सर्वं मुनिश्रेष्ठ कीर्त्यमानं त्वया विभो ।
कवचं वद सर्वत्र त्रैलोक्यविजयप्रदम् ॥ २, ३३.१॥
वसिष्ठ उवाच ।
शृणु वत्स प्रवक्ष्यामि कवचं परमाद्भुतम् ।
मन्त्रं च सिद्धिदं शश्वत्साधकानां सुखावहम् ॥ २, ३३.२॥
गोपीजनपदस्यान्ते वल्लभाय समुच्चरेत् ।
स्वाहान्तोऽयं महामन्त्रो दशार्णो भुक्तिमुक्तिदः ॥ २, ३३.३॥
सदाशिवस्त्वस्य ऋषिः पङ्क्तिश्छन्द उदाहृतम् ।
देवता कृष्ण उदितो विनियोगोऽखिलाप्तये ॥ २, ३३.४॥
त्रैलोक्यविजयस्याथ कवचस्य प्रजापतिः ।
ऋषिश्छन्दश्च जगती देवो राजेश्वरः स्वयम् ॥ २, ३३.५॥
त्रैलोक्यविजयप्राप्तौ विनियोगः प्रकीर्त्तितः ।
प्रणवो मे शिरः पातु श्रीकृष्णाय नमः सदा ॥ २, ३३.६॥
पायात्कपालं कृष्णाय स्वाहेति सततं मम ।
कृष्णेति पातु नेत्रे मे कृष्णस्वाहेति तारकाम् ॥ २, ३३.७॥
हरये नम इत्येष भ्रूलतां पातु मे सदा ।
ॐ गोविन्दाय स्वाहेति नासिकां पातु सन्ततम् ॥ २, ३३.८॥
गोपालाय नमो गण्डं पातु मे सततं मनुः ।
क्लीं कृष्णाय नमः कर्णौं पातु कल्पतरुर्मम ॥ २, ३३.९॥
श्रीं कृष्णाय नमः पातु नित्यं मेऽधरयुग्मकम् ।
ॐ गोपीशाय स्वाहेति दन्तपङ्क्तिं ममावतु ॥ २, ३३.१०॥
श्रीकृष्णेति रदच्छिद्रं पातु मे त्र्यक्षरो मनुः ।
ॐ श्रीकृष्णाय स्वाहेति जिह्विकां पातु मे सदा ॥ २, ३३.११॥
रामेश्वराय स्वाहेति तालुकं पातु मे सदा ।
राधिकेशाय स्वाहेति कण्ठं मे पातु सर्वदा ॥ २, ३३.१२॥
नमो गोपीगणेशाय ग्रीवां मे पातु सर्वदा ।
ॐ गोपेशाय स्वाहेति स्कन्धौ पातु सदा मम ॥ २, ३३.१३॥
नमः किशोरवेषाय स्वाहा पृष्ठं ममावतु ।
उदरं पातु मे नित्यं मुकुन्दाय नमो मनुः ॥ २, ३३.१४॥
ह्रीं श्रीङ्क्लीङ्कृष्णाय स्वाहा करौ पातु सदा मम ।
ॐ विष्णवे नमः स्वाहा बाहुयुग्मं ममावतु ॥ २, ३३.१५॥
ॐ ह्रीम्भगवते स्वाहा नखपङ्क्तिं ममावतु ।
नमो नारायणायेति नखरन्ध्रं ममावतु ॥ २, ३३.१६॥
ॐ ह्रींश्रीम्पद्मनाभाय नाभिं पातु सदा मम ।
ॐ सर्वेशाय स्वाहेति केशान्मम सदावतु ॥ २, ३३.१७॥
नमः कृष्णाय स्वाहेति ब्रह्मरन्ध्रं सदावतु ।
ॐ माधवाय स्वाहेति भालं मे सर्वदावतु ॥ २, ३३.१८॥
ॐ ह्रींश्रींरसिकेशाय कटिं मम सदावतु ।
नमो गोपीजनेशाय ऊरू पातु सदा मम ॥ २, ३३.१९॥
ॐ नमो दैत्यनाशाय स्वाहेत्यवतु जानुनी ।
यशोदानन्दनायेति नमोऽन्तो जङ्घकेऽवतु ॥ २, ३३.२०॥
रासारम्भप्रियायेति स्वाहान्तो ह्रीं ममावतु ।
वृन्दाप्रियाय स्वाहेति सकलाङ्गानि मेऽवतु ॥ २, ३३.२१॥
परिपूर्णमनाः कृष्णः प्राच्यां मां सर्वदावतु ।
स्वयं गोलोकनाथो मामाग्नेय्यां दिशि रक्षतु ॥ २, ३३.२२॥
पूर्णब्रह्मस्वरूपश्च दक्षिणे मां सदावतु ।
नैरृत्यां पातु मां कृष्णाः पश्चिमे पातु मां हरिः ॥ २, ३३.२३॥
गोविन्दः पातु वायव्यामुत्तरे रसिकेश्वरः ।
ऐशान्यां मे सदा पातु वृन्दावनविहारकृत् ॥ २, ३३.२४॥
वृन्दाप्राणेश्वरः शश्वत्पातु मामूर्द्ध्वदेशतः ।
सदैव मामधः पातु बलिध्वंसी महाबलः ॥ २, ३३.२५॥
जले स्थले चान्तरिक्षे नृसिंहः पातु मां सदा ।
स्वप्ने जागरणे चैव पातु मां माधवः स्वयम् ॥ २, ३३.२६॥
सर्वान्तरात्मा निर्लिप्तः पातु मां सर्वतो विभुः ।
इति ते कथितं भूप सर्वाघौघविनाशनम् ॥ २, ३३.२७॥
त्रैलोक्यविजयं नाम कवचं परमेशितुः ।
मया श्रुतं शिवमुखात्प्रवक्तव्यं न कस्यचित् ॥ २, ३३.२८॥
(फलश्रुतिः)गुरुमभ्यर्च्य विधिवत्कवचं धारयेत्तु यः ।
कण्ठे वा दक्षिणे बाहौ सोऽपि विष्णुर्न संशयः ॥ २, ३३.२९॥
स साधकोऽवसद्यत्र तत्र वाणीरमे स्थिते ।
यदि स्यात्सिद्धकवचो जीवन्मुक्तो न संशयः ॥ २, ३३.३०॥
निश्चितं कोटिवर्षाणां पूजायाः फलमाप्नुयात् ।
राजसूयसहस्राणि वाजपेयशतानि च ॥ २, ३३.३१॥
महादानानि यान्येव भुवश्चापि प्रदक्षिणा ।
त्रैलोक्यविजयस्यास्य कलां नार्हन्ति षोडशीम् ॥ २, ३३.३२॥
व्रतोपवासनियमाः स्वाध्यायाध्ययने तथा ।
स्नानं च सर्वतीर्थेषु नास्यार्हन्ति कलामपि ॥ २, ३३.३३॥
सिद्धत्वममरत्वं च दासत्वं श्रीहरेरपि ।
यदि स्यात्सिद्धकवचः सर्वं प्राप्नोति निश्चितम् ॥ २, ३३.३४॥
स भवेत्सिद्धकवचो दशलक्षं जपेत्तु यः ।
यो भवेत्सिद्धकवचो विजयी स भवेद्ध्रुवम् ॥ २, ३३.३५॥
राज्यं देयं शिरो देयं प्राणा देयाश्च भूपते ।
एतत्तु कवचं वत्स न देयं सङ्कटेऽपि च ॥ २, ३३.३६॥
मया प्रकाशितं यत्ते चैतेषां त्राणकारणात् ।
ममाज्ञाकरणाच्चैव तद्विद्धि कुलभास्कर ।
इदं धृत्वा तु कवचं चक्रवर्त्ती भवान्भव ॥ २, ३३.३७॥
इति श्रीब्रह्माण्डे महापुराणे मध्यमभागे त्रयस्त्रिंशत्तमाध्यायान्तर्गतं
वसिष्ठमुनिप्रोक्तं त्रैलोक्यविजयकवचस्तोत्रं समाप्तम् ।
ब्रह्माण्डपुराण । मध्यभाग । उपोद्धात । अध्याय ३३/१-३६॥
brahmANDapurANa . madhyabhAga . upoddhAta . adhyAya 33/1-36..
Proofread by PSA Easwaran