Vedavyasaproktam Hayagriva Stotram

वेदव्यासप्रोक्तं हयग्रीवस्तोत्रम्

स आदिः स मध्यः स चान्तः प्रजानां स धाता स धेयः स कर्ता स कार्यम् । युगान्ते स सुप्तः सुसङ्क्षिप्य लोकान्युगादौ प्रबुद्धो जगद्ध्युत्ससर्ज ॥ ८९॥ तस्मै नमध्वं देवाय निर्गुणाय गुणात्मने । अजाय विश्वरूपाय धाम्ने सर्वदिवौकसाम् ॥ ९०॥ महाभूताधिपतये रुद्राणां पतये तथा । आदित्यपतये चैव वसूनां पतये तथा ॥ ९१॥ अश्विभ्यां पतये चैव मरुतां पतये तथा । वेदयज्ञाधिपतये वेदाङ्गपतयेऽपि च ॥ ९२॥ समुद्रवासिने नित्यं हरये मुञ्जकेशिने । शान्तये सर्वभूतानां मोक्षधर्मानुभाषिणे ॥ ९३॥ तपसां तेजसां चैव पतये यशसोऽपि च । वाचश्च पतये नित्यं सरितां पतये तथा ॥ ९४॥ कपर्दिने वराहाय एकश‍ृङ्गाय धीमते । विवस्वतेऽश्वशिरसे चतुर्मूर्तिधृते सदा ॥ ९५॥ गुह्याय ज्ञानदृश्याय अक्षराय क्षराय च । एष देवः सञ्चरति सर्वत्रगतिरव्ययः ॥ ९६॥ इति महाभारते शान्तिपर्वणि ३२७ अध्यायान्तर्गतं वेदव्यासप्रोक्तं हयग्रीवस्तोत्रं सम्पूर्णम् । महाभारत । शान्तिपर्व । अध्याय ३२७/८९-९६॥ mahAbhArata . shAntiparva . adhyAya 327/89-96.. Proofread by PSA Easwaran