विष्णुनक्षत्रमाला
वन्दे नन्दितजिष्णुं घनरोचिष्णुं घनाघमभिभूष्णुम् ।
निरयं निराकरिष्णुं हृदि वर्तिष्णुं हृतामयं विष्णुम् ॥ १॥
वन्दे मन्दिततृष्णं नन्दितकृष्णं नमज्जनानुष्णम् ।
सततमसाधुमहोष्णं साधुसतृष्णं सकौस्तुभं कृष्णम् ॥ २॥
भुवनविमोहनरूपं यदुकुलदीपं यमीशसुप्रापम् ।
माधवमपास्ततापं मधुरालापं नमामि नतगोपम् ॥ ३॥
उत्पादितसुमबाणं जितमुरबाणं कृताखिलत्राणम् ।
ददतं निष्परिमाणं स्थिरनिर्वाणं भजे रमाप्राणम् ॥ ४॥
विदलितविविधसुरारिं विजितवलारिं नमामि नरकारिम् ।
धृतनन्दकतरवारिं पदसृतवारिंपरात्परं शौरिम् ॥ ५॥
दीनजनावनदक्षं दीर्णविपक्षं दयाभृतावेक्षम् ।
दितिभवगजहर्यक्षं देवाध्यक्षं भजे सरोजाक्षम् ॥ ६॥
जीर्णं तुलसीपर्णं तूर्णं स्वीकृत्य वेश्म विस्तीर्णम् ।
पूर्णं धान्यमजीर्णं स्वर्णं कृष्णेन किन्नु न वितीर्णम् ॥ ७॥
श्रुतियुवतिचिकुररत्नं कौस्तुभरत्रं जगच्च निर्यत्नम् ।
दधतं नमतां प्रत्नं चिन्तारत्नं भजामि यदुरत्नम् ॥ ८॥
द्वारं कृत्वा पार्थं यस्तत्त्वार्थं जगौ तमत्यर्थम् ।
कृष्णमबुध्बा व्यर्थं कालं स्वार्थं नयामि वाऽन्यार्थम् ॥ ९॥
सुन्दरपदारविन्दं समनुतिनिन्दं समर्पितानन्दम् ।
नन्दककरं मुकुन्दं नन्दितनन्दं नमामि गोदिन्दम् ॥ १०॥
कमलां वक्षसि कलयन्कम्बुं रचयन् करे शुचं दलयन् ।
अचलं कुशलं जनयन् अभयं कथयन् पुरोऽस्तु हरिरुदयन् ॥ ११॥
प्रभुमवनतजनमोदं प्रकटितवेदं प्रभाजिताम्भोदम् ।
करिगिरिशिखरविनोदं कमलाह्लादं कदापि नावेदम् ॥ १३॥
अच्युतमधिगतरङ्गंरमणीयाङ्गं रमाकृतालिङ्गम् ।
तल्पितशेषभुजङ्गं तार्थ्यशताङ्गं भजामि धृतशार्ङ्गम् ॥ १३॥
वेङ्कटशैलावासं वेदश्वासं विपाटितायासम् ।
नन्दितवेदव्यासं नीरदभासं हरिं भजन्नासम् ॥ १४॥
सद्गुणरत्ननिशान्तं सततं भान्तं सतामधिस्वान्तम् ।
भवगदवैद्यमनन्तं भवुकोदन्तं भजे रमाकान्तम् ॥ १५॥
वृन्दावनसञ्चारी कंसविदारी किरीटिहितकारी ।
यमुनातीरविहारी कौस्तुभधारी पुरोऽस्तु मधुवैरी ॥ १६॥
सुखयतु जगतां कर्ता नमतां भर्ता मुरस्य संहर्ता ।
चक्रगदादरधर्ता विपदपहर्ता रमाधराभर्ता ॥ १७॥
सकलचराचरनेतासम्पद्दाता समस्तरिपुजेता ।
सुखयतु भद्रभ्राता सुखसन्धाता सुमायुधाधाता ॥ १८॥
चम्पकवनवास्तव्यं सन्ततभव्यं सुरालिसम्भाव्यम् ।
देवीदक्षिणसव्यं गोपंदिव्यं विहाय किं सेव्यम् ॥ १९॥
नरनारायणनामा नवघनधामा निरस्तभवदामा ।
सुखयतु बदरीधामा सुखितसुदामा सुरेषु सप्रेमा ॥ २०॥
अवने प्रतिभावन्तं हृदि मणिमन्तं श्रिते दयावन्तम् ।
भुवने विभूतिमन्तं श्रियि रतिमन्तं भजामि भगवन्तम् ॥ २१॥
द्वाराट्टध्वजवत्यां द्वारावत्यां स्थितं प्रभावत्याम् ।
मधुयदुवृष्णिमहत्यां मङ्गलवत्यां हरिं दधे मत्याम् ॥ २२॥
सन्तं द्वारावत्यां सुकृतवसत्यां जितामरावत्याम् ।
प्रासादजालवत्यामुत्सववत्यां हरिं दधे मत्याम् ॥ २३॥
कम्बुसहोदरकण्ठं नतभयकुण्ठं नमामि वैकुण्ठम् ।
सज्जनलसदुपकण्ठं श्रीवैकुण्ठं श्रितं रमोत्कण्ठम् ॥ २४॥
पदरुचिजिताब्जशोभं पद्मालोभं परास्तविक्षोभम् ।
पाटितविमतमहेभं पङ्कजनाभं प्रणौमि जलदाभम् ॥ २५॥
विमलगुणप्राग्भारं विश्वाधारं विधेर्विधातारम् ।
विनुतं विबुधैर्धीरं वीरमुदारं विनौमि यदुशूरम् ॥ २६॥
प्रतिपादितपुरुषार्थं प्रमुदितपार्थं प्रकृष्टगुणसार्थम् ।
प्रभुमच्युतमत्यर्थं प्रास्तानर्थं प्रणौमि तत्त्वार्थम् ॥ २७॥
विष्णोस्तारामालां पठितुरबालां श्रियञ्च धारालाम् ।
स्वस्मिन् भक्तिमलोलां वचसां विमलां हरिर्दिशेन्मालाम् ॥ २८॥
इति श्वेतारण्यनारायणयज्वकृता विष्णुनक्षत्रमाला सम्पूर्णा ॥
Proofread by Gopalakrishnan, NA