Vishnusharmakritam Vishnu Stotram

विष्णुशर्मकृतं विष्णुस्तोत्रम्

विष्णुशर्म्मोवाच । प्रसीद भगवन्विष्णो प्रसीद पुरुषोत्तम । प्रसीद देवदेवेश प्रसीद कमलेक्षण ॥ ७९॥ जय कृष्ण जयाचिन्त्य जय विष्णो जयाव्यय । जय यज्ञपते नाथ जय विष्णो पते विभो ॥ ८०॥ जय पापहरानन्त जय जन्मज्वरापह । नमः कमलनाभाय नमः कमलमालिने ॥ ८१॥ नमः सर्वेश भूतेश नमः कैटभसूदन । नमस्त्रैलोक्यनाथाय जगन्मूल जगत्पते ॥ ८२॥ नमो देवाधिदेवाय नमो नारायणाय वै । नमः कृष्णाय रामाय नमश्चक्रायुधाय च ॥ ८३॥ त्वं माता सर्वलोकानां त्वमेव जगतः पिता । भयार्त्तानां सुहृन्मित्रं त्वं पिता त्वं पितामहः ॥ ८४॥ त्वं हविस्त्वं वषट्कारस्त्वं प्रभुस्त्वं हुताशनः । करणं कारणं कर्त्ता त्वमेव परमेश्वरः ॥ ८५॥ शङ्खचक्रगदापाणे मां समुद्धर माधव ॥ ८६॥ प्रसीद मन्दरधर प्रसीद मधुसूदन । प्रसीद कमलाकान्त प्रसीद भुवनाधिप ॥ ८७॥ इति श्रीस्कन्दपुराणे वैष्णवखण्डे अयोध्यामाहात्म्ये प्रथमाध्यायान्तर्गतं विष्णुशर्मकृतं विष्णुस्तोत्रं समाप्तम् । स्कन्दपुराण । वैष्णवखण्ड । अयोध्याखण्ड ८ । अध्याय १/७९-८७॥ skandapurANa . vaiShNavakhaNDa . ayodhyAkhaNDa 8 . adhyAya 1/79-87.. Proofread by PSA Easwaran