viShNustotram by Shiva

 शिवेन कृतं विष्णुस्तोत्रम् 

हर उवाच-
नमस्ते देवतानाथ नमस्ते गरुडद्ध्वज ।
शङ्खचक्रगदापाणे वासुदेव नमोऽस्तु ते ॥ १॥

नमस्ते निर्गुणानन्त अप्रतर्क्याय वेधसे ।
ज्ञानाज्ञान निरालम्ब सर्वालम्ब नमोऽस्तु ते ॥ २॥

रजोयुक्त नमस्तेऽस्तु ब्रह्ममूर्ते सनातन ।
त्वया सर्वमिदं नाथ जगत्सृष्टं चराचरम् ॥ ३॥

सत्त्वाधिष्ठित लोकेश विष्णुमूर्ते अधोक्षज ।
प्रजापाल महाबाहो जनार्द्दन नमोऽस्तु ते ॥ ४॥

तमोमूर्ते अहं ह्येष त्वदंशक्रोधसम्भवः ।
गुणाभियुक्त देवेश सर्वव्यापिन् नमोऽस्तु ते ॥ ५॥

भूरियं त्वं जगन्नाथ जलाम्बर हुताशनः ।
वायुर्बुद्धिर्मनश्चापि शर्वरी त्वं नमोऽस्तु ते ॥ ६॥

धर्मो यज्ञस्तपः सत्यमहिंसा शौचमार्जवम् ।
क्षमा दानं दया लक्ष्मीर्ब्रह्मचर्यं त्वमीश्वर ॥ ७॥

त्वं साङ्गाश्चतुरो वेदास्त्वं वेद्यो वेदपारगः ।
उपवेदा भवानीश सर्वोऽसि त्वं नमोऽस्तु ते ॥ ८॥

नमो नमस्तेऽच्युत चक्रपाणे नमोऽस्तु ते माधव मीनमूर्ते ।
लोके भवान् कारुणिको मतो मे त्रायस्व मां केशव पापबन्धात् ॥ ९॥

ममाशुभं नाशय विग्रहस्थं यद्ब्रह्महत्याऽभिभवं बभूव ।
दग्द्धोऽस्मि नष्टोऽस्म्यसमीक्ष्यकारी पुनीहि तीर्थोऽसि नमो नमस्ते ॥ १०॥

इति वामनपुराणे तृतीयाध्यायान्तर्गतं शिवेन कृतं
विष्णुस्तोत्रं समाप्तम् ॥

वामनपुराण । अध्याय ३/१४-२३॥


vAmanapurANa . adhyAya 3/14-23..

Encoded by D.K.M. Kartha and proofread by P.S.A. Easwaran