Viduraproktam Shri Krishnabandhanodyamasya Nishphalatvavarnanam

विदुरप्रोक्तं श्रीकृष्णबन्धनोद्यमस्य निष्फलत्ववर्णनम्

प्राग्ज्योतिषगतं शौरिं नरकः सह दानवैः । ग्रहीतुं नाशकत्तत्र तं त्वं प्रार्थयसे बलात् ॥ ४४॥ अनेन हि हता बाल्ये पूतना शिशुना तथा । गोवर्धनो धारितश्च गवार्थे भरतर्षभ ॥ ४५॥ अरिष्टो धेनुकश्चैव चाणूरश्च महाबलः । अश्वराजश्च निहतः कंसश्चारिष्टमाचरन् ॥ ४६॥ जरासन्धश्च वक्रश्च शिशुपालश्च वीर्यवान् । बाणश्च निहतः सङ्ख्ये राजानश्च निषूदिताः ॥ ४७॥ वरुणो निर्जितो राजा पावकश्चामितौजसा । पारिजातं च हरता जितः साक्षाच्छचीपतिः ॥ ४८॥ एकार्णवे शयानेन हतौ तौ मधुकैटभौ । जन्मान्तरमुपागम्य हयग्रीवस्तथा हतः ॥ ४९॥ अयं कर्ता न क्रियते कारणं चापि पौरुषे । यद्यदिच्छेदयं शौरिस्तत्तत्कुर्यादयत्नतः ॥ ५०॥ तं न बुध्यसि गोविन्दं घोरविक्रममच्युतम् । आशीविषमिव क्रुद्धं तेजोराशिमनिर्जितम् ॥ ५१॥ प्रधर्षयन्महाबाहुं कृष्णमक्लिष्टकारिणम् । पतङ्गोऽग्निमिवासाद्य सामात्यो न भविष्यसि ॥ ५२॥ इति महाभारते उद्योगपर्वणि १२८ अध्यायान्तर्गतं विदुरप्रोक्तं दुर्योधनस्य श्रीकृष्णबन्धनोद्यमस्य निष्फलत्ववर्णनं सम्पूर्णम् । महाभारत । उद्योगपर्व । अध्याय १२८/४४-५०॥ mahAbhArata . udyogaparva . adhyAya 128/44-50.. Proofread by PSA Easwaran