Vidyapatidvijakritam Purushottama Stotram

विद्यापतिद्विजकृतं पुरुषोत्तमस्तोत्रम् ५

स तु विप्रस्तत्र कुण्डे स्नात्वा सर्वात्मना हरिम् । प्रणम्य दूरतश्चैकमनास्तुष्टाव चान्तरे ॥ ६३॥ अक्षरातीतभगवत्कृष्णनारायणप्रभो । मुक्तेशजीवहृदयपरात्पर नमोऽस्तु ते ॥ ६४॥ सर्वकर्मसमाराध्य योगसाध्य नमोऽस्तु ते । प्रेमपाशविषयात्मँस्तीर्थात्मँस्ते नमोनमः ॥ ६५॥ नमस्तेजःस्वरूपाय पावनाय नमो नमः । हुताशनाय देवाय हृच्छ्रयाय च ते नमः ॥ ६६॥ मन्त्रस्थाय जीवनाय निर्वाणाय च ते नमः । सर्वानन्दप्रदात्रे ते ब्रह्मेशाय नमो नमः ॥ ६७॥ मायिने तत्त्विने मूर्तिमते विश्वाससाक्षिणे । जिष्णवे बहुशिरसे कमलेशाय ते नमः ॥ ६८॥ मामुद्धर कृपासिन्धो त्राहि वासनयाऽन्वितम् । इन्द्रद्युम्ननृपस्यापि कुरु सङ्कल्पपूरणम् ॥ ६९॥ इति विद्यापतिः स्तुत्वा ओमित्येवं जजाप ह । इति श्रीलक्ष्मीनारायणीयसंहितायां प्रथमे कृतयुगसन्ताने ५८४-अध्यायान्तर्गतं विद्यापतिद्विजकृतं पुरुषोत्तमस्तोत्रं सम्पूर्णम् । लक्ष्मीनारायणीयसंहिता । प्रथमे । अध्याय ५८४/६३-६९॥ lakShmInArAyaNIyasaMhitA . prathame . adhyAya 584/63-69.. Proofread by PSA Easwaran