Vidyapatikritam Vishnu Stotram

 विद्यापतिकृतं विष्णुस्तोत्रम् 

विद्यापतिरुवाच ।
प्रधानपुरुषातीत सर्वव्यापिन्परात्पर ।
चराचरपरीणामपरमार्थ नमोऽस्तु ते ॥ २२॥

श्रुतिस्मृतिपुराणेतिहाससम्प्रतिपादितैः ।
कर्मभिस्त्वं समाराध्य एक एव जगत्पते ॥ २३॥

त्वत्त एतज्जगत्सर्वं सृष्टौ सम्पद्यते विभो ।
त्वदाधारमिदं देव त्वयैव परिपाल्यते ॥ २४॥

कल्पान्ते संहृतं सर्वं त्वत्कुक्षौ सावकाशकम् ।
सुखं वसति सर्वात्मन्नन्तर्यामिन्नमोऽस्तु ते ॥ २५॥

नमस्ते देवदेवाय त्रयीरूपाय ते नमः ।
चन्द्रसूर्यादिरुपेण जगद्भासयसे सदा ॥ २६॥

सर्वतीर्थमयी गङ्गा यस्य पादाब्जसङ्गमात् ।
पुनाति सकलाँल्लोकांस्तस्मै पावयते नमः ॥ २७॥

हवींषि मन्त्रपूतानि सम्यग्दत्तानि वह्निषु ।
परिणामकृते तुभ्यम् ।
जगज्जीवयते नमः ॥ २८॥

यदंशमुपजीवन्ति जगन्त्यानन्दरूपिणः ।
सर्वकल्मषहीनाय तस्मै ब्रह्मात्मने नमः ॥ २९॥

निर्मलाय स्वरूपाय शुभरूपाय मायिने ।
सर्वसङ्गविहीनाय नमस्ते विश्वसाक्षिणे ॥ २.८.३०॥

बहुपादाक्षिशीर्षास्यबाहवे सर्वजिष्णवे ।
सर्वजीवस्वरूपाय नमस्ते सर्वरूपिणे ॥ ३१॥

नमस्ते कमलाकान्त नमस्ते कमलासन ।
नमः कमलपत्राक्ष त्राहि मां पुरुषोत्तम ॥ ३२॥

असारसंसारपरिभ्रमेण निपीड्यमानं खलु रोगशोकैः ।
मामुद्धरास्माद्भवदुःखजातात्पादाब्जयोस्ते शरणं प्रपन्नम् ॥ ३३॥

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्ये
      अष्टमाध्यायान्तर्गतं विद्यापतिकृतं विष्णुस्तोत्रं समाप्तम् ।

स्कन्दपुराण । वैष्णवखण्ड । पुरुषोत्तमखण्ड । अध्याय ८/२२-३३॥


skandapurANa . vaiShNavakhaNDa . puruShottamakhaNDa . adhyAya 8/22-33..

Proofread by PSA Easwaran