श्रीविजयनारसिंहस्तुतिः
भजदभयङ्कर भीमपराक्रम वीरनृसिंहविभो ।
खरनखरायुध पाहि परात्पर घोरतराघहर ॥ १॥
विष्फुरितालककेसरभासुर दीप्तललाटतट ।
फालविलोल विशङ्कट विष्फुरदग्नि विलोचन ! भो ॥ २॥
भ्रुकुटिभयङ्कर ! तरलिततारक केकरनेत्र जय ।
उद्गत निश्चल कर्णविलम्बित चन्द्ररविद्वय कर्णिक भो ॥ ३॥
विधुतसटारुण पटलतटस्फुट ऋक्षसहस्र जय ।
अतिशितपायित वज्रशतायित भीकरदंष्ट्र जय ॥ ४॥
विस्फुरदग्र मुखोदरनिर्गलदुग्र फणिद्युतिजिह्व जय ।
व्यायत घोर गुहामुखनिर्गत घनगुरुगर्जित विजय जय ॥ ५॥
तुङ्गभुजद्वय दण्डविजृम्भित शङ्खरथाङ्गकर ।
अंसविजृम्भण सम्भ्रमजृम्भित पीवरवत्स विभो ॥ ६॥
शुभ्र परिस्फुरदुग्रभुजङ्गम भङ्ग्युपवीत विभो ।
मुष्टिमितिक्रम पीतपटोत्कट मग्नवलग्न विभो ॥ ७॥
अष्टमहाभुज यष्टिविजृम्भण कूणितदृक् करिकूट विभो ।
वालविधूनन वेगविकम्पित सप्तसमीरण चक्र विभो ॥ ८॥
पीनतर प्रवरोरु समुद्धतिडोलित विश्वकटाह विभो ।
कच्छपकर्कश जानुविघट्टन भुग्नकुलाचलचक्र विभो ॥ ९॥
स्तम्भ विजृम्भण भावभयङ्कर विक्रमणक्रम जङ्घ विभो ।
युद्धसमुद्धत दानवमर्दन सज्जपदद्वयं जयजय भो ॥ १०॥
जयजय विश्वसुमङ्गल पिङ्गलवर्ण विनिर्जित नैशकल ।
ब्रह्मक्षत्रविबोध दिवाकर यादवशैल नृसिंह जय ॥ ११॥
घोरतरं तवरूपमिदं गुरुदेव रिपुव्रज भीतिकरम् ।
दुर्जन गर्जन तर्जन निश्चल साधुजन व्रजभीतिहरम् ॥ १२॥
जयतु जयोदय सम्भ्रम सम्भृत जय लक्ष्मीकर सङ्कलितम् ।
रूपमिदं तव देव महत्तरमुत्तम वीरदयादयितम् ॥ १३॥
जय जय विश्वविधारण कारण सत्वसमुद्धर धर्मविभो ।
जयजय सत्वर वैरिविजित्वर वीरनृसिंह विभो ॥ १४॥
दुष्ट भयङ्कर भक्तदयाकर चक्रगदाकर शङ्कर भो ।
जय जय जय जय देव जनार्दन जय नुतिरियमपि जयतितराम् ॥ १५॥
इति अरैयर श्रीरामशर्मणा बाल्य एव विरचिता श्रीविजयनारसिंहस्तुतिः सम्पूर्णा ।
Proofread by M K Barman