Viprakritam 1 Vishnu Stotram

 विप्रकृतं १ विष्णुस्तोत्रम् 

तं दृष्ट्वा भक्तिमान्देवं स्तोतुकामो व्यवस्थितः ।
जयेश जय वागीश जय दिव्याङ्गभूषण ॥ २५॥

जय देवपते श्रीमन्साक्षाद्ब्रह्म सनातन ।
तव लोकाः शरीरस्थास्त्वं गतिः परमेश्वर ॥ २६॥

त्वदाधारा हि देवेश सर्वे लोका व्यवस्थिताः ।
त्वं श्रेष्ठः सर्वसत्त्वानां त्वं कर्ता धरणीधरः ॥ २७॥

त्वं हौत्रमग्निहोत्राणां सूत्रमन्त्रस्त्वमेव च ।
गोकर्णं भद्रकर्णं च त्वं च माहेश्वरं पदम् ॥ २८॥

त्वं कीर्तिः सर्वकीर्तीनां दैन्यपापप्रणाशिनी ।
त्वं नैमिषं कुरुक्षेत्रं त्वं च विष्णुपदं परम् ॥ २९॥

त्वया तु लीलया देव पदाक्रान्ता च मेदिनी ।
त्वया बद्धो बलिर्देव त्वयेन्द्रस्य पदं कृतम् ॥ ३०॥

त्वं कलिर्द्वापरं देव त्रेता कृतयुगं तथा ।
प्रलम्बदमनश्च त्वं स्रष्टा त्वं च विनाशकृत् ॥ ३१॥

त्वया वै धार्यते लोकास्त्वं कालः सर्वसङ्क्षयः ।
त्वया हि देव सृष्टास्ताः सर्वा वै देवयोनयः ॥ ३२॥

त्वं पन्थाः सर्वलोकानां त्वं च मोक्षः परा गतिः ।
ब्रह्मा त्वदुद्भवो देवो रजोरूपः सनातनः ।
रुद्रः क्रोधोद्भवोऽप्येवं त्वं च सत्त्वे व्यवस्थितः ॥ ३३॥

एतच्चराचरं देव क्रीडनार्थं त्वया कृतम् ।

इति श्रीस्कन्दपुराणे आवन्त्यखण्डे रेवाखण्डे विंशाध्यायान्तर्गतं
         विप्रकृतं विष्णुस्तोत्रं समाप्तम् ।

स्कन्दपुराण । आवन्त्यखण्ड । रेवाखण्ड । अध्याय २०/२५-३३॥


skandapurANa . AvantyakhaNDa . revAkhaNDa . adhyAya 20/25-33..

Proofread by PSA Easwaran