Vyasakritam Vishnu Stotram

 व्यासकृतं विष्णुस्तोत्रम् 

प्राप्य वाराणसीं व्यासः स्नात्वा पञ्चनदे ह्रदे ।
श्रीमन्माधवमभ्यर्च्य पपौ पादोदकं ततः ॥ २८॥

तत्र स्नानादिकं कृत्वा दृष्ट्वा चैवादिकेशवम् ।
पञ्चरात्रं ततः कृत्वा वैष्णवैरभिनन्दितः ॥ २९॥

अग्रतः पृष्ठतः शङ्खैर्वाद्यमानैः प्रमोदितः ।
जयविष्णो हृषीकेश गोविन्द मधुसूदन ॥ २.९५.३०॥

अच्युतानन्त वैकुण्ठ माधवोपेन्द्र केशव ।
त्रिविक्रम गदापाणे शार्ङ्गपाणे जनार्दन ॥ ३१॥

श्रीवत्सवक्षः श्रीकान्त पीताम्बर मुरान्तक ।
कैटभारे बलिध्वंसिन्कंसारे केशिसूदन ॥ ३२॥

नारायणासुररिपो कृष्ण शौरे चतुर्भुज ।
देवकीहृदयानन्द यशोदानन्दवर्धन ॥ ३३॥

पुण्डरीकाक्ष दैत्यारे दामोदर बलप्रिय ।
बलारातिस्तुत हरे वासुदेव वसुप्रद ॥ ३४॥

विष्वक्चमूस्तार्क्ष्यरथ वनमालिन्नरोत्तम ।
अधोक्षज क्षमाधार पद्मनाभ जलेशय ॥ ३५॥

नृसिंह यज्ञवाराह गोपगोपालवल्लभ ।
गोपीपते गुणातीत गरुडध्वज गोत्रभृत् ॥ ३६॥

जय चाणूरमथन जय त्रैलोक्यरक्षण ।
जयानाद्य जयानन्द जय नीलोत्पलद्युते ॥ ३७॥

कौस्तुभोद्भूषितोरस्क पूतनाधातुशोषण ।
रक्ष रक्ष जगद्रक्षामणे नरकहारक ॥ ३८॥

सहस्रशीर्षपुरुष पुरुहूत सुखप्रद ।
यद्भूतं यच्च भव्यं वै तत्रैकः पुरुषो भवान् ॥ ३९॥

इति श्रीस्कादपुराणे काशीखण्डे पूर्वार्द्धे पञ्चनवतितमा- ध्यायान्तर्गतं
         व्यासकृतं विष्णुस्तोत्रं समाप्तम् ।

स्कन्दपुराण । काशीखण्ड । उत्तरखण्ड । अध्याय ९५/३०-३९॥


skandapurANa . kAshIkhaNDa . uttarakhaNDa . adhyAya 95/30-39..

Proofread by PSA Easwaran