यमगीतास्तवनम्
श्रीगणेशाय नमः । श्रीलक्ष्मीनृसिंहाय नमः ।
ॐ नमो भगवते तस्मै नृसिंहाय महात्मने ।
यन्नाम कीर्तनात्सद्यो नरकाग्निः प्रशाम्यति ॥ १॥
भक्तप्रियाय देवाय रक्षाय हरये नमः ।
लोकनाथाय शान्ताय यज्ञेशायादिमूर्तये ॥ २॥
अनन्तायाप्रमेयाय नारसिंहाय ते नमः ।
नारायणाय गुरवे शङ्खचक्रगदाभृते ॥ ३॥
वेदप्रियाय महते विक्रमाय नमोनमः ।
वाराहायाप्रतर्क्याय वेदाङ्गाय महीभृते ॥ ४॥
नमो द्युतिमते नित्यं ब्राह्मणाय नमोनमः ।
वामनाय बहुज्ञाय वेदवेदाङ्गधारिणे ॥ ५॥
बलिबन्धनदत्ताय वेदपालाय ते नमः ।
विष्णवे सुरनाथाय व्यापिने परमात्मने ॥ ६॥
चतुर्भुजाय शुद्धाय शुद्धद्रव्याय ते नमः ।
जामदग्न्याय रामाय दुष्टक्षत्रान्तकारिणे ॥ ७॥
रामाय रावणान्ताय नमस्तुभ्यं महात्मने ।
अस्मान्नुद्धर गोविन्द पूतिगन्धान्नमोऽस्तु ते ॥ ८॥
व्यास उवाच-
इति सङ्कीर्तिते विष्णौ नारकैर्भक्तिपूर्वकम् ।
तदा सा नारकी पीडा गता तेषां महात्मनाम् ॥ ९॥
कृष्णरूपधराः सर्वे दिव्यवस्त्रविभूषिताः ।
दिव्यगन्धानुलिप्ताङ्गाः दिव्याभरणभूषिताः ॥ १०॥
तानारोप्य विमानेषु दिव्येषु हरिपूरुषाः ।
तर्जयित्वा यमभटान् नीतास्ते केशवालयम् ॥ ११॥
नारकेषु च सर्वेषु नीतेषु हरिपूरुषैः ।
विष्णुलोकं यमो भूयो नमश्चक्रे तदा हरिम् ॥ १२॥
यन्नामकीर्तनाद्याताः नारका केशवालयम् ।
तन्नमामि सदा देवं नारसिंहमहं गुरुम् ॥ १३॥
तस्य वै नरसिंहस्य विष्णोरमिततेजसः ।
प्रणामं येऽपि कुर्वन्ति तेभ्योऽपीह नमोनमः ॥ १४॥
दृष्ट्वा प्रशान्तं नरकाग्निमुग्रं
यन्त्रादि सर्वं विपरीतमत्र ।
पुनः स शिक्षार्थमथात्मदूतान्
यमो हि वक्रं कृतवान्मनः स्वयम् ॥ १५॥
इति श्रीनरसिंहपुराणे यमगीतानाम स्तवनं सम्पूर्णमस्तु ।
Proofread by M K Barman