Shadabhijna Stotram

षडभिज्ञस्तोत्रम्

रूपलक्षणसम्पूर्णो हीनोच्चसमसेवनः । सन्दर्शय सदा दानं नमस्ते दानपारग ॥ १॥ शब्दलक्षणसम्पूर्णः सुशोभो गुणसागरः । संश्रावय सदा शीलं नमस्ते शीलपारग ॥ २॥ गन्धलक्षणसम्पूर्णो दिव्यप्राणो विनायकः । संप्रापय जिन क्षान्तिं नमस्ते क्षान्तिपारग ॥ ३॥ रसलक्षणसम्पूर्णः सुजिह्वो धर्मदेशकः । भाषस्व सौगतं धर्मं नमस्ते वीर्यपारगः ॥ ४॥ स्पर्शलक्षणसम्पूर्णः अनिरुद्धो निरीहकः । संस्पर्शय जिन ध्यानं नमस्ते ध्यानपारग ॥ ५॥ धर्मलक्षणसम्पूर्णः सत्त्वेषु समचिन्तकः । प्रज्ञोपायमहाप्राप्त नमस्ते बुद्धिपारग ॥ ६॥ षडभिज्ञस्तवं योऽयं त्रिसन्ध्यं भक्तिमान् पठेत् । संसारबन्धनं हित्वा स याति परमां गतिम् ॥ ७॥ इति श्रीमहाबुद्धभट्टारकस्य षडभिज्ञस्तोत्रं सम्पूर्णम् ॥