भारतगौरवम् २
(स्रग्धरा)
आलोलोल्लोलमाला-कलकलकलिताम्भोधिकूलाल्ललामाद्
यावन्नीहारभूमीधर - धवलशिला - लग्न - भू संविभागान् ।
सीमान्तादा च वङ्गोपसरिदधिपतिं यावदस्त्येष सस्यैः
पत्रश्यामैर्द्रुमाग्रैर्वलयितवसुधो भारतं नाम देशः ॥
वङ्गैः सङ्गीतकीर्तिः कलितकलकलश्चोत्कलैरान्ध्रबन्धु-
र्मद्रैरुन्निद्रमुद्रो जवजनितजयोद्गुर्जरः सिन्धुबिन्दुः ।
पञ्चापैरञ्चितश्रीर्मधुमधुरधुरो - मध्ययुक्तैर्विहारै -
रार्यावर्ताभिधानो जयति जनपदो मानिनां जन्मभूमिः ॥
देवैराप्यायितश्रीरपि सुरझरिणी - निर्झराम्भः - पुनीतो,
नीतः शिक्षां बृहत्याः पतिभिरनुदिनं कीर्तितो लेखवृक्षैः ।
मन्दारैः पारिजातादिभिरथ सहरिः पुण्यभोग्यः सुधाच्छो,
गन्धर्वैर्गीयमानो विलसति सकलो भारतस्वर्गलोकः ॥
गुञ्जद्-भृङ्गालि-गीतैः श्रुतिसुखमधुरैः कूजदालोहिताक्षै-
श्चूतास्वादातिरिक्तस्वरमुखर-पिकैर्माद्यदामोदवाहैः ।
पुष्पाणां पावमानः प्रकृति-वरवधू-नूतनाक्रीडमुग्धं
दिग्धं शोभाभिरामं कुशलकृतिकलोल्लासितं भारतं नः ॥
चारित्र्याणां निधानं मनुजतनुभृतां संविधानं शुचीनां
मर्यादानां निधानं विमलमतिमतां योगिनां सन्निधानम् ।
आधानं दिव्यभासां प्रकृतिविलसितागारमेकं प्रधानं
राष्ट्र न्यायावधानं प्रतिपदमयते भारतोच्चाभिधानम् ॥
विश्वेशः सर्वशक्तिर्गिरिवरतनया-साहचर्यार्चितश्रीः
सान्द्रानन्दामृताम्भोनिधिरमरसरिद्वीचिवाचाल मौलिः ।
स्वातन्त्र्योल्लासलोलां विलसितविभवां सर्वशोभाभिरामां
भव्यां भव्यैकभावां भरत भुवमिमां सर्वदा सम्बिभर्तु ॥
-कवितार्किकचक्रवर्तिश्रीमहादेवशास्त्रिणाम्,
वाराणसेयानाम् ।
Proofread by Mandar Mali