ग्रन्थमालिकास्तोत्रम्
कृष्णं विद्यापतिं नत्वा पूर्णबोधादिसद्गुरून् ।
जयतीर्थमुनीन् नत्वा वक्ष्येशं ग्रन्थमालिकाम् ॥ १॥
नारायणेन व्यासेन प्रेरितस्तत्त्वसंविदे ।
ग्रन्थान् मध्वश्चकारासौ सप्तत्रिंशदमन्दधीः ॥ २॥
गीताभाष्यं विधायादौ प्रथमं तुष्टिदं हरेः ।
भाष्य-अणुभाष्ये चक्रेस्थ ह्यनुव्याख्यानमुत्तमम् ॥ ३॥
प्रमाणलक्षणं नाम कथालक्षण-संज्ञिकम् ।
उपाधिखण्डनं चक्रे मायावादस्य खण्डनम् ॥ ४॥
चक्रे प्रपञ्चमिथ्यात्वमानखण्डन मुच्चधीः ।
चकार तत्त्वसङ्ख्यानं साधनं विष्णुदर्शने ॥ ५॥
ग्रन्थं तत्त्वविवेक-आख्यं तत्त्वोद्योतं हरेः प्रियम् ।
कर्मनिर्णयनामानं ग्रन्थं न्यायार्थबृंहितम् ॥ ६॥
सुखतीर्थयतिश्चक्रे विष्णुतत्त्वनिर्णयम् ।
ऋग्भाष्यं च चकारासौ सर्ववेदार्थनिर्णयम् ॥ ७॥
ऐतरेयं तैत्तिरीयं बृहदारण्यक मेव च ।
ईशावास्यं काठकं च छान्दोग्या-अथर्वणे तथा ॥ ८॥
माण्डूक्यं नाम षट्प्रश्नं तथा तलवकारकम् ।
चक्रे भाष्याणि दिव्यानि दशोपनिषदां गुरुः ॥ ९॥
निर्णयं सर्वशास्त्राणां गीतातात्पर्य संज्ञकम् ।
संन्यायविवृतिं नाम न्यायशास्त्रनिकृन्तनम् ॥ १०॥
नरसिंहनखस्तोत्रं चक्रे यमकभारतम् ।
द्वादशस्तोत्रमकरोत् कृष्णामृतमहार्णवम् ॥ ११॥
तन्त्रसारं चकारासौ सदाचारस्मृतिं सुधीः ।
श्रीमद्भागवतस्यापि तात्पर्यं ज्ञानसाधनम् ॥ १२॥
महाभारततात्पर्यनिर्णयं संशयच्छिदम् ।
यतिप्रणवकल्पं च प्रणवार्थप्रकाशकम् ॥ १३॥
जयन्तीनिर्णयं चक्रे देवकीगर्भजन्मनः ।
कृष्णस्य कृष्णभक्तोऽयं द्वैपायनकराब्जभूः ॥ १४॥
त्रिंशत्सहस्रसङ्ख्याकं द्व्यधिकं तुष्टिदं हरेः ।
एतेषां पाठमात्रेण मध्वेशः प्रीयते हरिः ॥ १५॥
व्यासतीर्थयतिर्नाम मध्वग्रन्थानुकीर्तनम् ।
कृतवान् ज्ञानमात्रेण प्रीयते कमलापतिः ॥ १६॥
॥ इति श्रीव्यासराजतीर्थकृतं श्रीग्रन्थमालिकास्तोत्रं सम्पूर्णम् ॥
The Grantha Malika StotraM of Sri Vyasaraja Theertha lists the 37 Works of Sri Acharya Madhwa.