वाल्मीकिकृतम् महाभारतग्रन्थकवचम्
वाल्मीकिरुवाच ।
कवचं कथ्यते विप्र भारतस्य शृणुष्व तत् ।
ॐ नमो भगवते तुभ्यं वासुदेवाय धीमहि ।
नराय परमेशाय जीवाय परमात्मने ॥ १॥
आदिपर्व पातु मूलवीजं पातु द्वितीयकम् ।
ऋषिर्नारायणः पातु शक्तीरामायणं तथा ॥ २॥
विराटपर्व छन्दश्च देवतार्यास्तवोऽवतु ।
प्रमाणं भगवद्गीता शक्तिमान् पातु भीष्मकः ॥ ३॥
प्रतिपाद्यं द्रोणपर्व कार्ण पर्वार्थकोऽवतु ।
निर्णयः शल्यपर्व स्यात् कर्ता पातु गदादिकम् ॥ ४॥
प्रयोजनं शान्तिपर्व स्वरूपमाश्वमेधिकम् ।
लक्षणञ्चावगम्यञ्च लयश्चान्यान्यवन्तु माम् ॥ ५॥
अव्यादाचरणीयञ्च सर्वाश्चर्यमथोत्तरम् ।
एतद्वै कवचं धृत्वा कुरु भारतमुत्तमम् ॥ ६॥
भारते फलसिद्धिश्च कवचादप्यतो भवेत् ।
पठ रामायणं व्यास काव्यवीजं सनातनम् ॥ ७॥
पुराणानाञ्च सर्वेषां क्रम एवंविधो मतः ।
अष्टादश पुराणानि तत्त्वान्यष्टादशैव तु ॥ ८॥
एवञ्चोपपुराणानि तत्त्वान्यष्टादशैव तु ।
महापुराणेषु मुने श्रीभागवतमन्ततः ॥ ९॥
बृहद्धर्मपुराणञ्च पुराणेष्वितरेषु च ।
मुने आचरणीयं स्यात् मूलादीनीतराणि च ॥ १०॥
कुरु सर्वपुराणानि महाभारतमेव च ।
तेषु तेषु पुराणेषु महाभारत एव च ।
यत्र रामचरित्रं स्यात् तदहं तत्र शक्तिमान् ॥ ११॥
ब्रह्मणो वचनं व्यास प्रतिपाल्यं करोमि वै ।
अन्येषान्तु मुनीनां वै ग्रन्थेषु सङ्ग्रही कृती ॥ १२॥
॥ इति बृहद्धर्मपुराणे त्रिंशत्तमोऽध्याये व्यासमहर्षे
वाल्मिकीद्वारा (महा)भारततत्त्वोपदेशः सम्पूर्णः ॥
॥ बृहद्धर्मपुराणम् । पूर्वखण्डः । अध्यायः ३०। ४१-५२॥