Potalaka Ashtakam

पोतलकाष्टकम्

जय सिद्धसुरासुरलोकगुरुं कमलासनसंस्थितपादयुगम् । दशपारमितादिकपद्मधरं प्रणमामि सदा वरकारुणिकम् ॥ १॥ बहुकोटिनराधिपलब्धवरं जय सुस्थितसुस्थितनाथमुनिम् । भवसागरपारगताधिकरं शरणागतसत्त्वहितार्थकरम् ॥ २॥ कमलासनचारुसुरूपधरममिताभतथागतमौलिधरम् । कमलोज्ज्वलभूषितगात्रवरं नवभास्करशोभनदीप्तिकरम् ॥ ३॥ मृदुताम्रनखाङ्गुलिशोभमुखं शशिबिम्बसमप्रभसौम्यमुखम् । षडभिज्ञगुणाकरवन्द्यतनुं वरसुस्थितनूपुरहारयुतम् ॥ ४॥ मणिकुण्डलमण्डितगण्डयुगं घनगर्जिततुल्यगभीररुतम् । गिरिगह्वरद्योतनिवासकृतं वृषवाहनहंसमृगायुशतम् ॥ ५॥ ऋषिदेवगणाधिपसंस्तुतिकं जिनरूपधरात्मकबोधिपरम् । द्विपदोत्तमनाथसुराधिपतिं बहुसत्त्वविमोचनमुक्तिकरम् ॥ ६॥ ध्वजछत्रसुशोभितवामकरं मलयागिरिचन्दनधूपरतिम् । कमलोत्पलपाटलिदामधरं प्रणमाम्यथ पाटलिवृद्धिकरम् ॥ ७॥ ज्वररोगविवर्जितकुष्ठहरं बहुबोधिमनाघनभद्रकरम् । नवदुर्गतिनाशनमार्गप्रदं करुणातथताद्वयविश्वपतिम् ॥ ८॥ इति श्रीआर्यावलोकितेश्वरस्य पोतलकाष्टकं सम्पूर्णम् ॥