putrI mama khalu nidrAti

पुत्री मम खलु निद्राति

पुत्री मम खलु निद्राति पुत्री मम खलु निद्राति । सुन्दरशयने सुखमयवसने पुत्री मम खलु निद्राति ॥ ध्रु.॥ रे रे वायस कर्कशकण्ठ! मा रट मा रट कर्णकठोरम् । श्रान्ता क्लान्ता पुनरनुनीता पुत्री मम खलु निद्राति ॥ १॥ म्याँव, म्याँव् मा कुरु घोरविरावं चल चल रे खल चोरबिडाल ! स्निग्धा मुग्धा सेवितदुग्धा पुत्री मम खलु निद्राति ॥ २॥ उच्चैर्मा भष शुनक वराक भौ भौ मा कुरु कार्यविहीन ! विमला कुशला सुमनोमृदुला पुत्री मम खलु निद्राति ॥ ३॥ रे रे मशक मा कुरु गानं मा स्पृश मा दश रक्तपिपासो । सुदती सुमुखी शोभनगात्री पुत्री मम खलु निद्राति ॥ ४॥