Rakshakalakara Stava

 रक्षाकालकरस्तवः 

ॐ नमो लोकनाथाय ।
मया कृतानि पापानि कायवाकचित्तसञ्चयैः ।
तत्सर्वं हर मे नाथ रक्ष मां लोकनायक ॥ १॥

नेपाले द्वादशाब्देषु अनावृष्टिर्महाभयम् ।
नरेन्द्रदेवं संस्थाप्य रक्ष मां लोकनायक ॥ २॥

मर्त्यभूमौ च पाताले दुःखिनो बहुलौकिकाः ।
सुखवृद्धिकरस्तेषां रक्ष मां लोकनायक ॥ ३॥

यत्र यत्र गतस्तत्र सर्वसत्त्वानुकम्पया ।
समुद्धरसि पापेभ्यो रक्ष मां लोकनायक ॥ ४॥

संसारे व्यापितोऽहं तु कथं पारं प्रयास्यते ।
त्वमेव शरणं तत्र रक्ष मां लोकनायक ॥ ५॥

सर्वदेवमयस्त्वं हि सर्वबुद्धमयस्तथा ।
सर्वसिद्धिमयश्चैव रक्ष मां लोकनायक ॥ ६॥

सदा कृपामयस्त्वं हि सदा रक्षामयोऽसि च ।
सदा प्रज्ञामयस्त्वं हि रक्ष मां लोकनायक ॥ ७॥

येन येन कृतं कर्म तेन तेनैव धारितम् ।
यद्यदिच्छां प्रदातासि रक्ष मां लोकनायक ॥ ८॥

सुखावतीं न संप्राप्तं यावद्धि सर्वसत्त्वकम् ।
तावत्संसारगर्तेऽस्मिन् रक्ष मां लोकनायक ॥ ९॥

ज्ञानिनां ज्ञानरूपोऽसि दुःखिनां दुःखहारकः ।
कामिनां कामरूपोऽसि रक्ष मां लोकनायक ॥ १०॥

पूजनीयोऽसि लोकेश प्रणवस्य स्वरूपधृक् ।
वन्दनीयः सदा त्वं हि रक्ष मां लोकनायक ॥ ११॥

भर्ति वा भर्तिको वापि मित्रं वा शत्रुकोऽपि वा ।
सर्वत्र च दयायुक्तो रक्ष मां लोकनायक ॥ १२॥

लोकनाथ जगत्स्वामिन् सुभक्तिकृतचेतसा ।
त्वां नमामि पुनर्भूयो रक्ष मां लोकनायक ॥ १३॥

अनेकदुःखभागस्मि भीष्मैर्वै कष्टसङ्कटैः ।
दयस्व चावलोकेश मोचयस्व च मां क्षणात् ॥ १४॥

सर्वदेक्षासुसम्पातं वर्तयन् कुरु मेऽक्षयम् ।
अस्तु ते करुणा मह्यं भक्तिं चैवाचलां कुरु ॥ १५॥

इति श्रीमदार्यावलोकितेश्वरभट्टारकस्य रक्षाकाल(कर)स्तवः समाप्तः ॥