संस्कृतभाषा सरला मधुरा
संस्कृतभाषा सरला मधुरा
सकलजनहिता सादरणीया ॥
उचितावसरे सुव्याहारे
सद्व्यवहारे साधुविचारे
सरसविनोदे सुजनामोदे
सर्वानन्दे श्रेयःसुपदे ॥
जात्युद्धरणे नीत्याख्याने
सत्यभाषणे मत्युत्थाने
नवपदरचने नव्यतापने
नानाचरणे न्यायवर्तने ॥
भेदापगमे द्वेषोपशमे
दोषापनये साम्योपनये
धर्मरक्षणे ज्ञानवर्धने
विश्वशान्तये समैक्यकार्ये ॥
- दाॅ. प्रभाकरशर्मा
Encoded and proofread by Shubha shubhazero at gmail.com